Qosshy qalasynyń ataýyna qatysty aitylǵan pikir áleýmettik jelide qyzý talqylanyp jatyr, dep habarlaidy dalanews.kz.
Jýrnalist Nurbek Bekbaý Facebook paraqshasynda media mamany Oljas Baidildanyń Qosshy ataýyn orys tiline «Prisoedini menia» dep aýdarýǵa qatysty aitqan pikirine jaýap berdi.
Onyń aitýynsha, Qosshy ataýy buiryq raidaǵy sóz emes jáne onyń tarihi maǵynasy múlde basqa.
«Qos – kósh, qosshy – kóshpeli degenniń balama ataýy. Keide áskerdiń damyldaý úshin tikken lagerin de “qos” dep ataǵan. Kenesary han týraly jyrlarda da bul sóz jii kezdesedi», – dep jazdy Bekbaý.
Ol tarihi derekterde «qos» uǵymy kóshpelilerdiń ýaqytsha qonysyn, al «qosshy» sol ortadaǵy adamdardy bildiretinin atap ótti. Sondai-aq keńestik kezeńde bul ataý mal sońynda júrgen shopandarǵa qatysty da qoldanylǵan.
«Iaǵni, “Qosshy” – buiryq raidaǵy sóz emes, kóshpeli degenniń taǵy bir ataýy. Ony “Prisoedini menia” dep aýdarý – saýatsyzdyq pen óz tilińe degen qurmetsizdiktiń belgisi», – dedi ol.
Eske salaiyq, buǵan deiin Oljas Baidilda Qosshy qalasynyń ataýyna qatysty ázil-syqaq sipatyndaǵy pikir aityp, ataýdy orys tiline «Prisoedini menia» dep aýdarýǵa bolatynyn jetkizgen bolatyn. Osydan keiin áleýmettik jelilerde qala ataýynyń shyǵý tegi men maǵynasy qyzý talqylana bastady.
