"Qairat" fýtbol klýbynyń bas bapkeri Rafael Ýrazbahtin Backstreet Boys kontserti ótkennen keiingi Ortalyq stadion gazonynyń sapasyna alańdaýǵa negiz joq ekenin aitty, dep habarlaidy Dalanews.kz.
RSK-degi brifingte jýrnalisterdiń suraǵyna jaýap bergen ol gazon sapasy syn kóteretinin atap ótti.
"Real" oiynshylary – joǵary deńgeidegi fýtbolshylar. Olarǵa bizdiń gazonda oinaý qiynǵa soǵady dep oilamaimyn. Gazon qorqynyshty jaǵdaida emes, nege sonsha synaisyzdar? Agronomdarymyz barynsha kútim jasap jatyr. Tipti “Seltik” pen “Slovanǵa” qarsy ótken oiyndarmen salystyrǵanda alań áldeqaida jaqsy. Aldaǵy ýaqytta odan da jaqsarady dep sendirdi. Sondyqtan biz eshqandai másele kórip turǵan joqpyz", – dedi Ýrazbahtin.
Gazon daýy
Aita keteiik, stadiondaǵy gazon máselesi sońǵy ailarda qyzý talqyǵa túsken. Buǵan birneshe iri kontsert sebep boldy. “Qairat” jankúierleriniń birlestigi sportqa qatysy joq sharalardy ótkizýdi toqtatýdy talap etip, mundai is-sharalar alańdy búldiretinin málimdegen. Buǵan qosa, “Seltikpen” ótken kezdesýden keiin shotlandiialyq klýbtyń bas bapkeri Brendan Rodjers te gazonnyń sapasyn synap, ony óz oiynshylarynyń álsiz oiynynyń sebepteriniń biri retinde ataǵan bolatyn. Sol oiynda almatylyqtar penalti seriiasynda jeńiske jetip, alǵash ret Chempiondar ligasynyń toptyq kezeńine joldama alǵan.
Aldaǵy qarsylastar
Jerebe qorytyndysy boiynsha «Qairat» tórt úi matchin ótkizedi. Qarsylastary – madridtik «Real», belgiialyq «Briýgge», grektiń «Olimpiakosy» jáne Kiprdiń «Pafosy».
Iri kontsertter men qaýipsizdik sharalary
Buǵan deiin álemdik juldyz Djennifer Lopestiń kontserti qarsańynda stadion infraqurylymy jańǵyrtylyp, jaryq júiesi tolyq aýystyrylǵan edi.
Sahnanyń tehnikalyq jabdyqtalýy men qaýipsizdik talaptaryna sáikestigi tekserildi. Syrtqy dárethanalar jańartyldy, qorshaýlar qalpyna keltirilip, irgeles aýmaq abattandyryldy.
Kontsert kezinde qoǵamdyq qaýipsizdikti qamtamasyz etý úshin 2960 qyzmetker jumyldyrylady: onyń ishinde 2240 politsiia qyzmetkeri, 600 áskeri qyzmetker, 120 jeke kúzet agenttigi ókilderi jáne 300 erikti boldy.
Stadion aýmaǵy tórt negizgi fan-aimaqqa bólinedi, árqaisysy 2–3 myń adamǵa arnalǵan. Bul kórermenderdiń qozǵalysyn baqylaý men tártip saqtaýǵa múmkindik berdi.
Qala ákimdigi tarapynan sanitarlyq talap da basty nazarda boldy. Stadion janyna qosymsha 100-ge jýyq biodárethana qoiyldy. «Taza Qazaqstan» aktsiiasy aiasynda eriktiler tazalyq jumystaryn júrgizip, is-shara barysynda tazalyqty qamtamasyz etti.
