"قايرات" فۋتبول كلۋبىنىڭ باس باپكەرى رافاەل ۋرازباحتين Backstreet Boys كونسەرتى وتكەننەن كەيىنگى ورتالىق ستاديون گازونىنىڭ ساپاسىنا الاڭداۋعا نەگىز جوق ەكەنىن ايتتى، دەپ حابارلايدى Dalanews.kz.
رسك-دەگى بريفينگتە جۋرناليستەردىڭ سۇراعىنا جاۋاپ بەرگەن ول گازون ساپاسى سىن كوتەرەتىنىن اتاپ ءوتتى.
"رەال" ويىنشىلارى – جوعارى دەڭگەيدەگى فۋتبولشىلار. ولارعا ءبىزدىڭ گازوندا ويناۋ قيىنعا سوعادى دەپ ويلامايمىن. گازون قورقىنىشتى جاعدايدا ەمەس، نەگە سونشا سىنايسىزدار؟ اگرونومدارىمىز بارىنشا كۇتىم جاساپ جاتىر. ءتىپتى “سەلتيك” پەن “سلوۆانعا” قارسى وتكەن ويىندارمەن سالىستىرعاندا الاڭ الدەقايدا جاقسى. الداعى ۋاقىتتا ودان دا جاقسارادى دەپ سەندىردى. سوندىقتان ءبىز ەشقانداي ماسەلە كورىپ تۇرعان جوقپىز"، – دەدى ۋرازباحتين.
گازون داۋى
ايتا كەتەيىك، ستاديونداعى گازون ماسەلەسى سوڭعى ايلاردا قىزۋ تالقىعا تۇسكەن. بۇعان بىرنەشە ءىرى كونسەرت سەبەپ بولدى. “قايرات” جانكۇيەرلەرىنىڭ بىرلەستىگى سپورتقا قاتىسى جوق شارالاردى وتكىزۋدى توقتاتۋدى تالاپ ەتىپ، مۇنداي ءىس-شارالار الاڭدى بۇلدىرەتىنىن مالىمدەگەن. بۇعان قوسا، “سەلتيكپەن” وتكەن كەزدەسۋدەن كەيىن شوتلانديالىق كلۋبتىڭ باس باپكەرى برەندان رودجەرس تە گازوننىڭ ساپاسىن سىناپ، ونى ءوز ويىنشىلارىنىڭ ءالسىز ويىنىنىڭ سەبەپتەرىنىڭ ءبىرى رەتىندە اتاعان بولاتىن. سول ويىندا الماتىلىقتار پەنالتي سەرياسىندا جەڭىسكە جەتىپ، العاش رەت چەمپيوندار ليگاسىنىڭ توپتىق كەزەڭىنە جولداما العان.
الداعى قارسىلاستار
جەرەبە قورىتىندىسى بويىنشا «قايرات» ءتورت ءۇي ءماچىن وتكىزەدى. قارسىلاستارى – مادريدتىك «رەال»، بەلگيالىق «بريۋگگە»، گرەكتىڭ «وليمپياكوسى» جانە كيپردىڭ «پافوسى».
ءىرى كونسەرتتەر مەن قاۋىپسىزدىك شارالارى
بۇعان دەيىن الەمدىك جۇلدىز دجەننيفەر لوپەستىڭ كونسەرتى قارساڭىندا ستاديون ينفراقۇرىلىمى جاڭعىرتىلىپ، جارىق جۇيەسى تولىق اۋىستىرىلعان ەدى.
ساحنانىڭ تەحنيكالىق جابدىقتالۋى مەن قاۋىپسىزدىك تالاپتارىنا سايكەستىگى تەكسەرىلدى. سىرتقى دارەتحانالار جاڭارتىلدى، قورشاۋلار قالپىنا كەلتىرىلىپ، ىرگەلەس اۋماق اباتتاندىرىلدى.
كونسەرت كەزىندە قوعامدىق قاۋىپسىزدىكتى قامتاماسىز ەتۋ ءۇشىن 2960 قىزمەتكەر جۇمىلدىرىلادى: ونىڭ ىشىندە 2240 پوليسيا قىزمەتكەرى، 600 اسكەري قىزمەتكەر، 120 جەكە كۇزەت اگەنتتىگى وكىلدەرى جانە 300 ەرىكتى بولدى.
ستاديون اۋماعى ءتورت نەگىزگى فان-ايماققا بولىنەدى، ءارقايسىسى 2–3 مىڭ ادامعا ارنالعان. بۇل كورەرمەندەردىڭ قوزعالىسىن باقىلاۋ مەن ءتارتىپ ساقتاۋعا مۇمكىندىك بەردى.
قالا اكىمدىگى تاراپىنان سانيتارلىق تالاپ دا باستى نازاردا بولدى. ستاديون جانىنا قوسىمشا 100-گە جۋىق بيودارەتحانا قويىلدى. «تازا قازاقستان» اكسياسى اياسىندا ەرىكتىلەر تازالىق جۇمىستارىن جۇرگىزىپ، ءىس-شارا بارىسىندا تازالىقتى قامتاماسىز ەتتى.
