"Qoqysty jerge kóme salý ne taýdai qylyp úiip qoiý ádetke ainaldy". Bektenov qaldyqty kádege jaratýdy usyndy

Úkimet otyrysynda premer-ministr Oljas Bektenov kommýnaldy qaldyqtardy qaita óńdep, keiin ony kádege jaratýdy usyndy, - dep habarlaidy Dalanews.kz.

Premer-ministr kommýnaldyq qaldyqtardy basqarýdyń tiimdi júiesin qalyptastyrý qajet ekenin málimdedi.

"Halyqaralyq tájiribe kórsetip otyrǵandai, damyǵan elder turmystyq qaldyqtardy qaitadan óńdep, barynsha kádege jaratýda. Al bizde qarapaiym sózben aitqanda, jinalǵan qoqysty jerge kóme salý, tipti bolmasa taýdai qylyp úiip qoiý úirenshikti jaǵdaiǵa ainaldy. Bul eldi-mekenderdiń kórkin buzýmen qatar, eshqandai sanitariialyq, ekologiialyq normalarǵa sai kelmeidi", - dedi Oljas Bektenov.

Úkimet basshysy Qazaqstanda qaldyqtardy qaita óńdeýdi aitarlyqtai arttyrýdyń mańyzyn aitty.

"Osyndai jobalardy iske asyrý kezinde kásiporyndardy ekonomikalyq jaǵynan yntalandyrýdyń tiimdi tetikteri engizilýi qajet. Onyń ústine, kommýnaldyq qaldyqtardy qaita óńdeý men suryptaý jobalary 15 jylǵa 3% jeńildikti mólsherlememen Ónerkásipti damytý qory arqyly qarjylandyrylatyn bolady", - dedi premer-ministr.

Al Ekologiia ministrligi málimetinshe, 1 million tonnadan asa qatty turmystyq qaldyqtar suryptalyp, qaita óńdelgen.

"2023 jyly elimizde 4,1 mln tonnaǵa jýyq kommýnaldyq qaldyqtar túzilgen. Onyń 1 mln tonnasy suryptalyp, qaita óńdeldi. Qoqysty shyǵarý qyzmetimen elimizdiń 80%-ǵa jýyq halqy turatyn qalalar men iri eldi mekender qamtamasyz etilgen. Kommýnaldyq qaldyqtardyń morfologiialyq quramy shamamen 70% paidaly fraktsiialardan turady, atap aitqanda 16% plastik, 11% makýlatýra, 9% shyny, 37% organikalyq qaldyqtar, 27% taǵy basqalary", - dedi ekologiia ministri Erlan Nysanbaev Úkimet otyrysynda.

Qaldyqtarǵa qatysty jobalardy jeńildetilgen qarjylandyrýǵa 200 mlrd. teńge bólingen.

"Úkimet qaldyqtardy basqarý salasyndaǵy jobalardy jeńildikpen qarjylandyrý tetigin bekitti. Onyń ishinde qoqys shyǵaratyn kólikterdi, suryptaý jelilerin jáne qaita óńdeý qýattaryn satyp alý bar. Qarjylandyrý Ónerkásipti damytý qory arqyly 3 jyldan 15 jylǵa deiingi qaryz berý merzimin jáne 3%-dyq syiaqy mólsherlemesin qarastyrady. Bólinetin qarajattyń jalpy mólsheri 3 jylǵa shamamen 200 mlrd teńge bolady", - dedi ekologiia jáne tabiǵi resýrstar ministri E.Nysanbaev.