Qarjaýbai Nurymovtyń qaryndasy Perizat Nurymova halyqtan kómek surap, aqsha jinai bastady, dep habarlaidy Dalanews.kz.
Perizat Nurymova aqsha jinalyp jatqanyn rastap, oǵan balalarynyń qaýipsizdigi sebep bolǵanyn aitty.
"Bul jaǵdai bastalǵaly beri jeke ózime qoqan-loqylar jasaldy. Quzyrly organdarǵa aryz jazdym. Tekseriske jiberdim. Búginde óz balalarymnyń qaýipsizdigin oilaimyn. Páterdi jaldap turatyn múmkindigim joq. Ony jaldaý úshin kelisimshart jasasýym kerek. Al páterin jalǵa beretinder meni kórgende, alty balam bar ekenin estigende páterin jalǵa bermeidi. Osy kúnge deiin ata-anammen birge turdym. Balalarymdy alyp, bólek shyqqym keledi”, deidi Perizat Nurymova.
Buǵan deiin quqyq qorǵaýshy Aitbek Amangeldi Sherzat Bolattyń otbasyna arnalǵan úi qaiyrymdy azamattyń qarjysyna salynatynyn málimdegen bolatyn.
Aitýynsha, bunyń milliardtaǵan qarajat jymqyrdy degen kúdikke ilingen Perizattyń qoryna eshqandai qatysy joq.
“Qarjaýbaidyń otbasy úshin úi metsenat qarajatyna salynady. Perizattyń jinaǵan aqshasy bul maqsatqa paidalanylmaidy. Bizdiń bul jinaqqa qatysymyz joq. Onyń rekvizitterin bilmeimiz. Qazirgi ýaqytta pikirlerde túrli rekvizit taralyp jatyr. Sondyqtan alaiaqtyq áreketterdiń qurbany bolyp qalmańyzdar. Eger naqtylaý qajet bolsa, Perizattyń ózine habarlasqandaryńyz jón. Bul jinaqtyń maqsaty bizge beimálim”, – dedi Aitbek Amangeldi.
Sonymen qatar ol Perizattyń óz advokattary bar ekenin atap ótti.
