2021 jyldan beri QDB zaımyna úmitkerler tiziminde Medeu Park Hotel kompanıasy da bolǵan, alaıda osy aptada bank bul jobany tizimnen alyp tastaǵan. Bank bunyń sebebin «ındıkatıv analızge qajetti qujattar tapsyrmady» dep túsindirgen.
Kursiv.media málimetinshe, Boranbaev qonaq úı kesheni qarajatynyń úshten ekisin Medeu Park Hotel kompanıasy arqyly Qazaqstan damý bankinen alýdy kózdegen.
Byltyr Almatyda ótken ınvestısıa forýmynda Medeu Park Hotel kompanıasynyń qarjy dırektory Arman Ramazanov QDB-ten 10- 12,5 mıllıard teńge alýdy josparlaǵanyn aıtqan.
Kursiv.media dereginshe, keńes zamanyndaǵy eski «Medeý» qonaq úıi súrilip, onyń ornyna úsh qabatty ǵımarat salyna bastaǵan. Ol Medeu Park Hotel 2022 jylǵy jeltoqsanda ashylady dep josparlanǵan. Alaıda nysan pasportyndaǵy aqparatta qurylys 2024 jylǵy naýryzda aıaqtalatyny jazylǵan.
Boranbaevqa tıesili taǵy bir kompanıa ótinishin Qazaqstan damý banki qabyldamady, dep habarlady basylym. Bul kompanıa Býtakovka shatqalynda Butakovka Wellness&SPA saýyqtyrý keshenin salýdy kózdegen. Qurylysqa 13 mıllıard teńge qajet. Qarajattyń bir bóligin kompanıa Qazaqstan damý bankinen alǵysy kelgen, dep jazdy Kursiv.media.
Qaırat Boranbaev — eks-prezıdent Nursultan Nazarbaevtyń qyzy Darıǵa Nazarbaevanyń burynǵy qudasy. Ony qazaqstandyq Forbes eldegi yqpaldy bes kásipker qataryna engizgen.
Qazaqstanda Boranbaevqa «asa iri kólemde aqsha jymqyrdy» degen kúdikpen bıyl naýryz aıynda ustaldy. Sodan keıin onyń Almatydaǵy parkıngterdi basqaratyn eki kompanıasy Almaty ákimdigine qaıtaryldy. Buǵan qosa, Boranbaevtyń Qaraǵandy farmasevtıka kesheni sáýir aıynda reseılik «Spýtnık V» vaksınasyn shyǵarýdy doǵardy.
