Qonaev qalasyndaǵy áskeri bólimderdiń birinde merzimdi áskeri qyzmetin ótep júrgen 2006 jyly týǵan sarbaz tórtinshi qabattan qulap, aýyr jaraqat aldy. Qazir ol jansaqtaý bóliminde jatyr, dep habarlaidy dalanews.kz.
"Kriminalnyi Kazahstan" telegram arnasynyń málimetinshe, sarbaz qyzmetke shaqyrylǵannan beri otbasymen turaqty bailanysta bolǵan jáne áskeri ómirge qatysty eshqandai shaǵym aitpaǵan. Oqiǵaǵa deiin kóp uzamai ata-anasy oǵan arnaiy baryp qaitqan.
"Ulymyz bizben únemi habarlasyp turdy. Qyzmetine de, densaýlyǵyna da qatysty eshqashan shaǵymdanǵan emes. Jaqynda ǵana baryp kórip qaittyq, bári jaqsy siiaqty kóringen edi", - deidi jaqyndary.
Aldyn ala málimetke sáikes, áskeri qyzmetshi birneshe qabyrǵasynan aiyrylyp, ókpesi, búiregi jáne qýyq tusynan aýyr jaraqat alǵan.
Alaida sarbazdyń týystary onyń terezeden ózdiginen qulap ketkeni týraly boljamǵa kúmánmen qaraidy. Olar oqiǵanyń barlyq mán-jaiy jan-jaqty ári ádil tergelýi qajet dep esepteidi.
"Biz onyń óz erkimen terezeden qulaǵanyna senbeimiz. Áskeri bólimdegi beinebaqylaý kameralarynyń jazbalary jariialanyp, oqiǵaǵa tolyqqandy ári obektivti tergeý júrgizilýin talap etemiz", - deidi sarbazdyń jaqyndary.
Qazirgi ýaqytta oqiǵanyń naqty sebepteri men mán-jaiy anyqtalyp jatyr.
