Qonaev qalasynda zańsyz saýdamen kúresýdiń jańa tetigi iske qosylmaq. Bul týraly Abai kóshesiniń boiynda, belgilenbegen oryndarda saýda jasaityndarmen kezdesýde qala ákimi Ashat Berdihanov aitty, – dep habarlaidy Dalanews.kz Almaty oblysy ákiminiń baspasóz qyzmetine silteme jasap.
Kezdesýde saýdagerler ákimnen kúnkóris kózinen aiyrmaýdy surady. Shahar basshysy bolsa, ákimdiktiń ustanymyn túsindirip, olarǵa birneshe talap qoidy.
– Buǵan deiin sizderge «Aisha siti» bazarynda 6 ai, «Jetisý» bazarynda 3 ai tegin oryndardy daiyndap berdik. Tutynýshy az bolatynyn alǵa tartyp, barmadyńyzdar. Qazir qala úlkeiip, kúnnen-kúnge damyp keledi. Máseleni bir jaǵyna shyǵarýymyz kerek. Abattandyrylyp, ádemi bolyp turǵan kósheniń kelbetin zańsyz saýda oryndary buzyp turǵanyn bárimiz túsinýimiz qajet, – dedi Ashat Berdihanov.
– Turǵyndar aýlada saýda jasaityndar qoqystaryn tastap ketetinin, aiaq alyp júre almaityndai jaǵdai týǵanyn aityp, jii shaǵymdanady. Sizderdiń qamdaryńyzdy oilap, problemaǵa birjaqty qaraýǵa bolmaidy, – dedi shahar basshysy.
Ákim túitkildi tarqatý úshin «Aisha siti» bazarynyń aldyna dúńgirshekter qoiylatynyn aitty.
– Ákimdik barlyq turǵynnyń qamyn oilaidy. Sol úshin sizderdi tyńdai kele, bazardyń aldynan dúńgirshekter ornatýdy jón kórip otyrmyz. Biraq, biznes oryndary qoiylǵanda sizder jeke kásipker retinde tirkelip, salyq tólep, jumys jasaýlaryńyz qajet, – dedi ákim.
Sodan keiin ákim «Aisha siti» bazaryn aralap shyqty. Bazar basshylyǵyna jańadan salynyp jatqan nysandy biryńǵai dizain-kodqa sáikes etip jasaýdy tapsyrdy. Al sáýlet jáne qala qurylysy, kásipkerlik bólimderiniń basshylaryna saýda oryndaryn qoiý úshin tez arada qujattardy rásimdeýdi júktedi.
