Atyraý halqy qolqany qabatyn ótkir iisten tunshyǵyp otyrǵanyn aitty, dep habarlaidy Dalanews.kz "KTK" telearnasyna siltep.
Ekologtar kúkirtsýteginiń mólsheri qaýipti deńgeige jetkenin anyqtapty.
"Ekologiia departamenti halyq kóp shaǵymdanǵan aimaqtardan synama alyp, aýa sapasy lastanǵanyn anyqtady. Kúkirtsýtegi Tasqala aýyly mańynda 17 esege, Tasqala aýylyna irgeles aýmaqta 15 esege, Himikter aýylynda 36,3 esege shekten asqan. Qazir zertteý qujattary daiyndalyp jatyr. Atyraý munai óńdeý zaýytyna baqylaý júrgiziledi", - dedi Atyraý oblysy Ekologiia departamenti basshysynyń orynbasary Erlan Esenov.
Demalysta Atyraý munai óńdeý zaýyty mańyndaǵy turǵyndar ótkir iisten esik-terezesin ashpai, dalaǵa shyǵa almai qalǵan. Tipti qart kisiler "densaýlyǵymyz syr berdi" dep shaǵymdanǵan.
Ekologtar kúkirtsýteginiń mólsheri kóp degenimen, munai óńdeý zaýytynyń ókilderi munymen kelispei otyr.
"Atyraý aýmaǵynda zaýyttan basqa da lastaýshy kózder bar. Naqty qaidan bolǵanyn quzyrly organdar aitady", - dedi AMÓZ Qorshaǵan ortany qorǵaý bóliminiń jetekshi injeneri Móldir Borashova.
