Jaqynda Qazaqstan qarjy politsiiasynyń eks-basshysy jáne Qazaqstannyń burynǵy bas prokýrory Qairat Qojamjarovtyń shynaiy oqiǵaǵa negizdelgen "Qanisher kim?" atty detektiv týyndysy jaryqqa shyqty. Birqatar telegram arnalar kitaptyń jazylýyn "Qorǵas isi" boiynsha jańadan bastalǵan tergeýmen bailanystyrady. Aitýlarynsha, kezinde Qojamjarovtyń qaramaǵynda bolǵan qyzmetkerler oǵan qarsy aiǵaqtar berýde. Osy tusta Dalanews.kz saiasi boljamǵa sholý jasap kórdi.
Úkimet dálizinen qaýeset taratýshylardyń pikirinshe, elimizdiń kitap dúkenderinde satylymǵa shyqqan detektiv týyndy Qojamjarovtyń qazirgi Qazaqstan biligine baǵyttalǵan bir eskertýi bolsa kerek. Naqtyraq aitsaq, bul Qazaqstannyń saiasi ári biznes-elitasy, sondai-aq quqyq qorǵaý organdarynyń qazirgi jáne burynǵy sheneýnikterimen áli de tyǵyz bailanysy bar eks-sheneýniktiń "Qorǵas isi" tergeýinde aiyptalýshy bolǵysy kelmeitinin meńzeidi.
"Kitap detektiv janrynda shynaiy oqiǵalarǵa negizdelip jazylǵandyqtan, Qojamjarovtyń birqatar joǵary laýazymdy tulǵalarǵa qatysty jinaǵan kompromattyq sipattaǵy naqty derekteriniń áli de bar ekenin tikelei kórsetedi. Sebebi ol Qazaqstannyń qarjy politsiiasynyń basshysy, qala berdi Qazaqstannyń bas prokýrory qyzmetin de atqarǵanyn eske salamyz", - deidi telegram arnalar.
Iá, Qojamjarovtyń kitaby ár jyldary Qazaqstan aýmaǵynda oryn alǵan jáne ártúrli vedomstvo tergegen túrli qylmystyq isterdi sipattaýdan turatyn jinaq. Demek, Qojamjarovtyń 2017-2019 jyldar aralyǵynda basqarǵan Qazaqstan Bas prokýratýrasyndaǵy muraǵaty kitapqa negiz bolǵan.
Mundai kitapty arnaiy avtorlar ujymy daiyndap, (bul jaǵdaida kitapty Qojamjarovtyń ózi jazǵan degen derek joqqa shyǵady), "ádebi sańlaqtar" ony jazýmen ainalysady. Iaǵni, redaktordyń jetekshiligimen burynǵy nemese qazirgi jýrnalisterge materialdar tolyqqandy qoljetimdi bolǵan. Bul rette, qylmystyq isterdiń materialdaryn daiyndaý birneshe aidan bir jylǵa deiin sozylýy múmkin ekenin eske salamyz.
"Osy arqyly Qojamjarov quqyq qorǵaý organdarynyń qazirgi jáne burynǵy qyzmetkerlerimen aýqymdy bailanysy bar ekenin, bógde adamdardyń da Qazaqstan Bas prokýratýrasynyń muraǵatyna tolyq ári shekteýsiz qoljetimdiligin qamtamasyz etýge qabiletti ekenin, sondai-aq Qazaqstan Bas prokýratýrasy muraǵatynyń bir bóligi kóshirilgenin jáne onyń jeke ieliginde ekenin kórsetip berdi", - deidi arnalar.
Bul rette Qazaqstan qarjy politsiiasynyń eks-basshysy men Qazaqstannyń burynǵy bas prokýrorynyń kitabyn daiyndaý kezinde arnaiy avtorlar ujymy jumyldyrylǵanyn janama túrde kórsetkendei. Máselen, QR Parlamenti Senatynyń depýtaty, "Habar" telearnasynyń burynǵy qyzmetkeri, sonymen qatar Qazaqstan Respýblikasy Tuńǵysh Prezidentiniń qyzy Dariǵa Nazarbaevanyń qaramaǵynda jumys istegen – Vladimir Rerihtiń burynǵy áieli Dana Nurjigitova kitapty áleýmettik jelidegi paraqshasynda tikelei tanystarǵan bolatyn.
Eske salsaq, Qojamjarov Qazaqstan qarjy politsiiasyn basqarǵan. Qazaqstannyń bas prokýrory, Aqmola oblysynyń ákimi qyzmetterin de atqardy. Nursultan Nazarbaevtyń buiryǵymen, senat depýtaty boldy.Bas prokýror qyzmetin atqarǵan kezde kóptegen rezonansty ister negizsiz, oidan shyǵarylǵan dep tanylǵan. Keiin onyń qaramaǵynda istegen qyzmetkerlerdiń ústinen qylmystyq ister qozǵalyp, qamaýǵa alynady.
Kezinde Qojamjarovtyń artynan "Qorǵas isinen" paida kórgenderdiń biri degen sóz ergen. Biraq bul derek is júzinde dáleldenbegen. Eks depýtat bul suraqqa naqty jaýap berýden jaltaryp kelgen edi. Endi mine, jańa týyndysy jaryqqa shyqty. Munda ol barlyq suraqqa astarlap jaýap berýdi kózdegen syńaily.
