Sot otyrysy ZOOM arqyly onlain rejimde ótti. Birtanovtyń advokattary tergeý sotynyń sheshimimen kelispeidi. Olar klientin úi qamaýyna zańsyz qaldyrdy dep sanaidy.
Sýdia Birtanovtyń jeke basyna qol suqpaýshylyq quqyǵyn óreskel buzdy. Ol ony zańdy negizsiz bas bostandyǵynan ádeii aiyrdy.Nátijesinde Qylmystyq is júrgizý kodeksiniń 16-babyna sáikes, azamat Birtanovtyń quqyqtary men bostandyqtaryn qorǵaýǵa mindetti sýdia ony zańsyz sheshim shyǵarý arqyly maqsatty túrde buzdy, - dedi advokat Dmitrii Kýriachenko.
Eks-ministrdiń qorǵaýshysy 14 shildedegi qaýlynyń kúshin joiyp, Birtanovty úi qamaǵynan bosatýdy talap etti.
Eljan Birtanov advokattardyń shaǵymyn qoldady.
"Ózderińiz biletindei, ótken jyldyń qazan aiynda maǵan biýdjet qarajatyn jymqyrdy nemese ysyrap etti degen aiyp taǵylyp, 10 ai boiy biýdjet qarajatyn jymqyrdy degen kúdikke ilindim. 10 aidan keiin is asyra silteý sanatyna aýystyryldy.
Men emes, muny mazmuny men taǵaiyndalǵan aiyp pen jazasy ártúrli bolyp keletin jaryq kórgen ártúrli maqalalar aityp bere alady. Meni ustap, kúdik keltirgeni óz aldyna bir basqa nárse, al búkil qoǵam 10 ai boiy meni biýdjet qarajatyn urlaýǵa qatysty dep eseptep keldi.
Al uzaq tergeý ýaqyty ótkennen keiin maǵan qyzmetimdi asyra paidalandy degen aiypqa ainalǵany - bul basqa másele. Aitaiyn degenim, men bul kúdikpen kelispeimin jáne eshqandai qiianat bolmaǵanyn dáleldeý úshin basty sot protsesin kútemin. Osy oraida, meniń advokattarymnyń appeliatsiialyq shaǵymyn obektivti túrde qaraýyńyzdy suraimyn", - dedi Densaýlyq saqtaý ministrliginiń eks-basshysy.
Biraq prokýror advokattarmen kelispedi. Onyń aitýynsha, Birtanovty úi qamaǵyna alý merzimin 14 qyrkúiekke deiin uzartý týraly buiryq zańdy túrde qabyldanǵan.
Birtanov pen onyń qorǵaýshylarynyń shaǵymyn qanaǵattandyrýsyz qaldyrýdy suraimyn, - dedi Sanat Talqanbaev.
Sýdia Eleonora Ońǵarsynova Birtanovty qamaýǵa alý merzimin uzartý týraly sheshimdi ózgerissiz qaldyrdy. Ol tergeý sotynyń qorytyndylary dáleldi jáne zań normalaryna sáikes keletindigin aitty.
Tergeý sotynyń úkimi ózgerissiz qaldyrylsyn, advokattardyń jeke shaǵymdary qanaǵattandyrylǵan joq, - dedi ol.
8 shildede Qarjy monitoringi agenttigi Eljan Birtanov pen densaýlyq saqtaý salasynyń burynǵy vitse-ministri Oljas Ábishevke qatysty sotqa deiingi tergeýdi aiaqtaǵany belgili boldy.
