Qazaqstan Respýblikasy Mádeniet jáne aqparat ministrliginiń tapsyrysy boiynsha Qazaqstandyq qoǵamdyq damý institýty 2025 jylǵy 12–19 qyrkúiekte Prezident Q.K. Toqaevtyń Qazaqstan halqyna Joldaýyn qoǵamnyń qalai qabyldaǵanyn zerdeleý maqsatynda ekspress-saýalnama júrgizdi, dep habarlaidy Dalanews.kz
Aqparat jinaý ádisi: halyqtan telefonmen suhbat alý arqyly jappai saýalnama júrgizý.
Zertteý kezdeisoq irikteme boiynsha júrgizildi. Munda Qazaqstannyń eresek (18 jastan asqan) turǵyndarynyń jynysy, jasy, qonystaný túri jáne turǵylyqty jeri týraly derekter qamtylady. Iriktemelik jiyntyq kólemi – 1 200 respondent.
Áleýmettik zertteý aýmaǵy Qazaqstan Respýblikasynyń barlyq óńirin qamtydy – respýblikalyq mańyzy bar qalalar: Astana, Almaty, Shymkent jáne 17 oblys ortalyǵy, sondai-aq aýyldyq eldi mekender.
Saýalnama Memleket basshysy Qasym-Jomart Toqaevtyń 2025 jylǵy 8 qyrkúiektegi «Jasandy intellekt dáýirindegi Qazaqstan: ózekti máseleler jáne ony túbegeili tsifrlyq ózgerister arqyly sheshý» atty Qazaqstan halqyna Joldaýyn qoǵamnyń qalai qabyldaǵanyn zertteýge arnalǵan.
Júrgizilgen saýalnama nátijelerine sáikes, halyqtyń Prezident Joldaýynan habardar bolýynyń jalpy deńgeii 72,6%-dy qurady. Kelesidei jaýaptardyń jiyntyq máninen habardar bolý deńgeii anyqtaldy: «Prezident Joldaýyn tyńdadym» (19,1%), «Joldaýdyń negizgi ideialaryn jańalyqtardan, internettegi/áleýmettik jelilerdegi/gazetter men jýrnaldardaǵy jariialanymdardan bildim» (25,9%), «Estidim, biraq egjei-tegjeiin bilmeimin» (27,6%).
Aýyldyq eldi mekenderde halyqtyń habardar bolý deńgeii qalalarǵa qaraǵanda tómen. Budan bólek, jas mólsheri men habardarlyq arasynda ózara bailanys bar ekenin atap ótken jón. Iaǵni, respondentterdiń jasy ulǵaiǵan saiyn Joldaý týraly habardar bolý deńgeii de arta túsedi.
Saýalnama derekterine sáikes, Joldaýdan habardar respondentterdiń basym bóligi Joldaý týraly oń pikirde – 71,2% («Tolyǵymen oń» jáne «Oń deýge bolady» jaýaptarynyń jiyntyq máni).
Joldaýdyń negizgi ideialarymen tanys respondentter Memleket basshysy usynǵan eń mańyzdy bastamalar men sharalarǵa aldymen Qazaqstannyń tsifrlyq transformatsiiasyna qatysty ózekti mindetter men sheshimderdi jatqyzdy: jasandy intellektini ómirdiń ártúrli salalaryna engizý (27,4%), ekonomikany aýqymdy tsifrlyq jańǵyrtý (19,9%), Jasandy intellekt jáne tsifrlyq damý ministrligin qurý (8,3%).
Sondai-aq saýalnamaǵa qatysýshylar arasynda ádettegidei Memleket basshysynyń áleýmettik-ekonomikalyq bastamalary men tapsyrmalaryna qyzyǵýshylyq baiqaldy: «Alatau City» jobasyn iske asyrý (21,4%), jańa Salyq kodeksi (18,6%), áleýmettik tólemderdiń mólsherin birizdendirý (17,0%), aýyl sharýashylyǵy salasyn jańa deńgeige kóterý (15,5%), AES salý (12,0%).
Prezidenttiń ádep mádenietin qalyptastyrý jónindegi tujyrymdary halyqtyń erekshe nazaryn aýdardy: teris minez-qulyq úlgilerinen arylý (12,0%); áleýmettik masyldyqtan bas tartý (10,6%).
Sonymen qatar Memleket basshysynyń parlamenttik reformany júrgizý týraly usynysy qoǵam tarapynan qyzyǵýshylyq týdyrdy. Partiialyq tizim boiynsha birpalataly Parlament qalyptastyrý ideiasyn respondentterdiń 62,8%-y ózekti dep sanaidy.
(Eskertý: jaýaptardyń jalpy jiyny 100%-ǵa teń emes, sebebi respondentter birneshe jaýap nusqasyn tańdaýǵa múmkindik alǵan).
Jalpy, telefon arqyly júrgizilgen saýalnama nátijeleri halyqtyń Qazaqstan Prezidentiniń halyqqa Joldaýy týraly joǵary deńgeide habardar ekenin baiqatty. Aita keterligi, saýalnamaǵa qatysqan azamattardyń eleýli bóligi Joldaýdan ózderin tolǵandyrǵan suraqtarǵa jaýap alǵan. Osylaisha, áleýmettik zertteý nátijeleri Memleket basshysynyń Joldaýy el damýynyń jalpyulttyq kún tártibin tek memlekettik organdar úshin ǵana emes, búkil qoǵam úshin de aiqyndaitynyn kórsetedi.
