Air Astana áýe kompaniiasy Astanadan Almatyǵa ushpaq bolǵan halyq ártisi Bibigúl Tólegenovaǵa dórekilik kórsetken. Osy tusta qoǵam belsendisi Leka Savaleva áýe kompaniia prezidenti Piter Fosterge úndeý joldap, bolǵan jaǵdai úshin keshirim suraýyn talap etti, dep habarlaidy Dalanews.kz.
“3 qyrkúiek kúni saǵat 10.30-da Astanadan Almatyǵa ushatyn Air Astana áýe kompaniiasynyń 852 reisinde jaisyz oqiǵa oryn aldy. Aty ańyzǵa ainalǵan ánshi, KSRO halyq ártisi jáne Qazaqstannyń halyq ártisi Bibigúl Tólegenovaǵa Air Astana qyzmetkerleri ushaqqa otyrǵyzý kezinde dórekilik kórsetti”, - dep jazdy Leka Saveleva Facebook paraqshasynda.
Áýe kompaniianyń qyzmetkerlerine Bibigúl Ahmetqyzynyń densaýlyǵy syr beretini, iaǵni omyrtqasynda aqaý bar ekeni habarlanǵan. Arbaǵa otyrǵan óner iesin qyzy shyǵaryp salmaq bolǵan. Biraq kenetten olardy Air Astana qyzmetkeri toqtatyp, arbadaǵy jolaýshylar birinshi bolyp otyrǵyzylatynyn, al keshikken jaǵdaida sońǵy jolaýshynyń ótkenin kútý kerek ekenin aitqan.
“Bibigúl Ahmetqyzy arbamen tek ushaqtyń kirebirisine deiin ǵana baryp, ary qarai eshkimge kedergi keltirmei ornyna jaiǵasqysy keldi. Onyń ústine sol ýaqytta topyrlaǵan jolaýshy da bolmady. Arbamen ońai ári tez ótip ketýge múmkindik boldy”, - delingen hatta.
Sodan keiin halyq ártisi Astananyń Qurmetti azamaty ekenin alǵa tartqan.
“Qyzmetker munyń bárin biletinin aityp, ereje adamnyń mártebesine, jasy men laýazymyna qaramastan bárine birdei qoldanylatynyn óte qatal ári dóreki túrde jetkizgen. Osylaisha qyzmetkerden onyń bastyǵynyń kim ekeni jáne onymen qalai bailanysýǵa bolatynyn suraǵan. Ol bul jerde ózi jaýapty bastyq ekenin, al qalǵan basshylyq Almatyda, sondyqtan barlyq shaǵym sonda túsetinin aitqan”, – dep jazady Leka Saveleva.
Qoǵam belsendisi Air Astana áýe kompaniiasynan úlkenderge qurmet kórsetip, óner iesinen keshirim suraýyn talap etip otyr.
“Eir Astana, sizderdiń taraptan Bibigúl Ahmetqyzy Tólegenovaǵa beretin túsiniktemelerińiz ben keshirim suraýlaryńyzdy kútemiz! Árbir jolaýshy qurmet pen iltipatqa laiyq. Álde sizderde basqa da erejeler bar ma?" - dep jazdy Saveleva.
Áýe kompaniianyń baspasóz qyzmeti qoǵam belsendisiniń jazbasyna keri bailanysyn berdi. Alaida olar halyq ártisine qurmet tanytqanymen, keshirim suramaǵan.
“Áýe qaýipsizdiginiń halyqaralyq erejelerine sai, arbada otyrǵan jolaýshylar ushaqqa eń birinshi bolyp nemese eń sońynda minedi. Iaǵni, osy ereje jolaýshylardyń bári úshin yńǵaily, sondai-aq, terminaldan evakýatsiialaý erejelerine sai. Bizdiń qolymyzdaǵy aqparatqa súiensek, Qazaqstannyń halyq ártisi Bibigúl Tólegenova men onyń qyzy jolaýshylar ushaqqa mine bastaǵanda kelgen. Sondyqtan áýe kompaniiasynyń agenti jolaýshylar minip alǵansha kúte turyńyzdar degen. Áýe kompaniiasy osy oqiǵanyń oryn alǵanyna qatty ókinedi jáne qyzmet sapasyn jaqsartý úshin qosymsha tekseris júrgizedi", - dep jazǵan kompaniia.
