8 maýsymda «QazMunaiGaz» UK AQ (QMG) Basqarma tóraǵasy Ashat Hasenov Pavlodarǵa jumys sapary barysynda, Pavlodar munai-himiia zaýytynyń (PMHZ) tehnologiialyq keshenderimen tanysyp, óndiristik máseleler boiynsha jinalys ótkizdi, dep habarlaidy Dalanews.kz.
Zaýyt qyzmeti men 17 maýsymda bastalyp bir aiǵa sozylatyn josparly aldyn alý jumystaryna (JAAJ) daiyndyq máseleleri basshylyqtyń basty nazarynda boldy.
2024 jyldyń 5 aiynda PMHZ shamamen 2,5 mln tonna shikizatty qaita óńdep, shamamen 730 myń tonna benzin, 807 myń tonna dizel óndirdi. Bitým boiynsha óndiris kólemi 130 myń tonnany, mazýt boiynsha — 217 myń tonnany, suiytylǵan gaz boiynsha — 147 myń tonnany, aviaotyn boiynsha — 113 myń tonnany qurady. Zaýyt kóptegen kórsetkishter boiynsha jospardyń asyra oryndalǵanyn kórsetýde.
«PMHZ-nyń turaqty jáne senimdi atqaratyn qyzmeti ishki naryqty áleýmettik mańyzdy munai ónimderimen qamtamasyz etýde sheshýshi ról atqarady. Qaýipsizdik tehnikasy talaptarynyń barlyq normalaryn saqtai otyryp, 2024 jylǵy josparly aldyn alý jumystaryn bekitilgen merzimde sapaly júrgizýdi qamtamasyz etý qajet», — dep atap ótti Ashat Hasenov jóndeýdi merziminen buryn aiaqtaý múmkindigin qarastyrýdy tapsyra otyryp.
Elimizdegi mol janar-jaǵar mai qorynyń qalyptasýyna bailanysty JAAJ óńirlerdi munai ónimderimen qamtamasyz etýge áser etpeidi.
Sonymen birge jinalys barysynda aǵymdaǵy jyldyń qańtar aiynda PMHZ-nyń bitým óndirý qondyrǵysynda jańa peshtiń sátti iske qosylýy, ónim shyǵarýdy 11%-ǵa arttyrýǵa múmkindik bergendigi ‒ maýsymdyq jol-qurylys jumystary kezeńinde mańyzdy bolǵandyǵyna toqtaldy.
Munai óńdeý jáne munai ónimderin óndirý tereńdigin arttyrýǵa baǵyttalǵan negizgi jobalar da talqylandy. Onyń ishinde benzin jáne dizel otynyn óndirýdi arttyrýǵa septigin tigizetin — dizel otynyn gidrotazartý qondyrǵysyn qaita jańartý jáne sýtegi óndirý qondyrǵysyn salý jobalary bar.
Ashat Hasenov zaýytta jumysshylardyń moraldyq ahýaly men áleýmettik-turmystyq jaǵdailaryn saqtaý boiynsha turaqty jaǵdai qalyptasqandyǵyn atap ótti.
QR Ekologiialyq kodeksine sáikes 2025 jylǵy 01 qańtardan bastap eń úzdik qoljetimdi tehnologiialar (ÚQT) normalarymen keshendi ekologiialyq ruqsattyń (KER) bolýy týraly talap kúshine enedi. Osyǵan bailanysty zaýyt basshylyǵyna KER-di tiisti merzimde alýdy baqylaý tapsyryldy.
