Anonimdi Telegram arnalarynyń birinde sottalǵan Perizat Qairattyń týystaryna Dýbaida birneshe páter tiesili ekeni týraly aqparat jariialandy. Qarjylyq monitoring agenttigi bul aqparatqa qatysty málimdeme jasady, dep habarlaidy dalanews.kz.
Buǵan deiin Qarjylyq monitoring agenttigi atalǵan adamdardyń jyljymaityn múlikti Perizat Qairattyń qylmystyq jolmen tapqan aqshasyna satyp alýy múmkin degen boljamdy teksergen. Alaida bul boljam rastalmady.
Tergeý barysynda barlyq qarjylyq operatsiialar jan-jaqty taldanyp, jymqyrylǵan aqshany zańdastyrýdyń búkil tizbegi anyqtaldy.
Perizat Qairat qaiyrymdylyqqa jinalǵan aqshany iemdenip, ony avtokólikter men páterler satyp alýǵa, páterlerdi jóndeýge jáne jihazben jabdyqtaýǵa, qymbat brendterdiń kiim-keshegi men áshekei buiymdaryna, biznes-klaspen ushýǵa, sándi qonaqúilerde turýǵa, meiramhanalar men oiyn-saýyq oryndaryna jumsaǵan.
Al A. otbasy múshelerimen qandai da bir qarjylyq esep aiyrysý júrgizgeni anyqtalǵan joq. Onyń ústine, jariialanymdarda atalǵan jyljymaityn múlik 2011–2019 jyldary, iaǵni «Biz Birgemiz Qazaqstan 2030» qory qurylǵanǵa jáne Perizat Qairat qylmystyq áreketke kiriskenge deiin satyp alynǵan. Jalpy, A. erli-zaiyptylary 20 jyldan astam ýaqyt boiy jyljymaityn múlik satyp alyp, qaita satýmen ainalysyp keledi.
Olar Perizat Qairat pen onyń anasynan bólek turyp, kásipkerlik qyzmetin de derbes júrgizgen.
Qylmystyq-protsestik kodekstiń 161-babyna sáikes, múliktiń qylmystyq jolmen alynǵanyn rastaityn dálelder bolǵan jaǵdaida ǵana ony buǵattaýǵa jáne tárkileýge jol beriledi. Kúdiktilermen týystyq bailanysy bar degen sebeptiń ózi adamdy qylmystyq jaýapqa tartýǵa jáne múlkin tárkileýge zańdy negiz bola almaidy.
