2026 jylǵy 11 qazanda Ormýz buǵazy mańynda jáne Oman jaǵalaýynda eki saýda kemesine shabýyl jasalyp, eki úndistandyq teńizshi joǵalyp ketti, al qalǵan 20 ekipaj múshesi aman qaldy, dep habarlaidy dalanews.kz.
Úndistan biliginiń málimetinshe, alǵashqy oqiǵa MT Valthera tankerimen bailanysty. Marshall araldarynyń týy astynda júzetin keme Ormýz buǵazy arqyly ótip bara jatqanda belgisiz snariadqa ushyraǵan. Soqqydan keiin kemede órt shyqqan. Tankerdegi 11 úndistandyq ekipaj múshesiniń barlyǵy aman qalǵan.
Ekinshi oqiǵa Omannyń Sohar porty mańyndaǵy zákir turaǵynda bolǵan. Nikaragýa týy astynda júzetin MT Petro Dolphin tankerine dronmen shabýyl jasalǵan. Kemede 11 úndistandyq teńizshi bolǵan. Olardyń toǵyzy qutqarylyp, qaýipsiz jerge jetkizildi, al eki adamnyń qaida ekeni ázirge belgisiz. Jergilikti jaǵalaý kúzeti izdestirý-qutqarý jumystaryn jalǵastyryp jatyr.
Úndistannyń Syrtqy ister ministrligi eki kemege jasalǵan shabýyldy aiyptady. Vedomstvonyń málimdeýinshe, kommertsiialyq kemelerge jasalǵan shabýyldar aimaqtaǵy onsyz da kúrdeli jaǵdaidy ýshyqtyrýy múmkin. Ministrlik taraptardy shielenisti dereý báseńdetýge, dialog pen diplomatiiaǵa basymdyq berýge shaqyrdy.
Úndistannyń Maskattaǵy elshiligi Oman biligimen jáne kemelerdi basqaratyn kompaniialarmen bailanysta ekenin habarlady. Elshilik joǵalǵan teńizshilerdi izdeý jumystaryna qoldaý kórsetip, ekipaj múshelerine qajetti kómek kórsetý máselesin baqylaýda ustap otyr.
Ormýz buǵazy Parsy shyǵanaǵyn Oman shyǵanaǵymen bailanystyrady jáne álemdik munai tasymaly úshin strategiialyq mańyzy bar teńiz joly sanalady. Aimaqtaǵy kemelerge jasalǵan shabýyldar teńiz qatynasynyń qaýipsizdigine qatysty alańdaýshylyqty kúsheitip otyr. Qazirgi ýaqytta eki oqiǵaǵa kimniń qatysy bar ekeni týraly resmi túrde rastalǵan aqparat jariialanǵan joq.
