Qarjylyq monitoring agenttigi kásipker Qairat Boranbaevtyń aktivterine qatysty málimdeme jasady, - dep habarlaidy Dalanews.kz.
Vedomstvo málimetinshe, taraǵan aqparat shyndyqqa janaspaidy.
"Kei jekelegen BAQ ókilderiniń Qairat Boranbaevtyń memleket paidasyna aktivterdi berýi jalǵan bolǵany týraly taratqan aqparaty shyndyqqa janaspaidy. Jariialanǵan aqparattarǵa sai aktivterdi memlekettik organdardyń balansyna berý protsesi aiaqtaldy. Eki nysan boiynsha qaita tirkeý rásimi ótkizilip jatyr", - dep jazylǵan vedomstvo habarlamasynda.
Kúni keshe Boranbaevtyń quny 134,5 milliardtan asatyn qonaqúiin eshkim satyp almaǵany habarlanǵan bolatyn. "Komfort Otel Astana" satyp alý quqyǵymen senimgerlik basqarýǵa berý boiynsha tender ótkizilmegen.
Sebebi tender boiynsha eshkim ótinish bermegen. Aýktsionǵa bir adam ǵana qatyssa da saýda júrgiziletini aitylǵan.
Qonaq úidiń bastapqy baǵasy - 3,9 mlrd teńgeden, al kepildik jarna 587 mln teńge bolǵan.
Qonaqúidi satyp alýshydan Qazaqstanda qonaqúilerdi basqarýdyń 7 jyldyq tájiribesi talap etildi. Senimgerlik basqarý merzimi 5 jyl boldy, al qonaq úidi 1 jyldan keiin ǵana merziminen buryn satyp alýǵa bolady. Kásipker Qairat Boranbaev bul qonaqúidi memleketke sot protsesteri kezinde jáne odan keiin tapsyrǵan.
Boranbaev memleketke bergen múliktiń quny 134,5 mlrd teńgeden asady.
Aita keteiik, byltyr qarashada Qairat Boranbaev bas bostandyǵynan aiyrý oryndarynan shyqty.
Bastapqyda Qairat Boranbaev 8 jylǵa sottalǵan edi. Alaida artynsha jaza merzimi 6 jylǵa deiin qysqardy.
16 qazanda Qairat Boranbaev Astananyń ortalyǵyndaǵy 4 juldyzdy qonaqúidi memleket menshigine tapsyrǵany belgili boldy. Aýmaǵy bes myń sharshy metrden asatyn qonaq úi kesheniniń jyldyq ainalymy shamamen 900 million teńgeden asady.
