Qyzylorda qalasynda ońtústik óńirlerdegi energıa tapshylyǵyn sheshýge baǵyttalǵan aýqymdy joba – qýattylyǵy 240 MVt jylý-elektr ortalyǵynyń qurylysy qarqyn aldy. Quny 215 mlrd teńgeni quraıtyn nysannyń 70%-dan astamy daıyn, – dep habarlaıdy Dalanews.kz
Qyzylorda qalasynda 240 MVt elektr energıasy men 277 Gkal jylý energıasyn óndiretin jańa jylý-elektr ortalyǵy salynyp jatyr. Quny 215 mlrd teńge bolatyn qurylysty Túrkıanyń «Aksa Energy» kompanıasy júrgizýde. Búginde ortalyq qurylysyna 137 mlrd teńgeden astam ınvestısıa salyndy.
Joba aıasynda qýatylyǵy 180 MVt bolatyn 2 gaz-týrbına qondyrǵysy (General Electric, AQSH), 95 MVt-tyq bý týrbınasy (Doosan Skoda, Chehıa), 2 bý qazandyǵy (AC BOILERS, Italıa) men 4 jylý qazandyǵy (Mimsan, Túrkıa) qoıylady. Qazirgi kezde negizgi qondyrǵylar jetkizilip, ornatylýda. Qurylys jumystarynyń 70%-ǵa jýyǵy aıaqtaldy.
Prezıdent tapsyrmasymen Qyzylorda oblysynda salynatyn, quny 800 mlrd teńge, qýattylyǵy 1100 MVt bolatyn bý-gaz qondyrǵylarynyń qurylysy – ońtústik óńirlerdiń energetıkalyq táýelsizdigine baǵyttalǵan megajoba. «Samuryq Energo» kompanıasy Katar ınvestorymen kelissóz júrgizip, tehnıkalyq-ekonomıkalyq negizdemesin ázirledi. Jańa bý-gaz qondyrǵylaryn salý úshin oblys ákimdigi 280 gektar jer telimin bóldi. Óńirdiń áleýmettik-ekonomıkalyq damýyndaǵy óte mańyzdy jobany 2028 jyly iske qosý josparlanǵan.
Ońtústik óńirlerge tabıǵı gaz tartý maqsatynda «Beıneý-Bozoı-SHymkent» gaz qubyrynyń ekinshi jelisin salý kózdelgen. Uzyndyǵy 1500 shaqyrym bolatyn gaz jelisiniń 843 shaqyrymy Qyzylorda oblysynyń aýmaǵynan ótedi degen boljam bar.
