Qyzylordada qysqartylǵan kúrish alqaptarynyń ornyna sýdy az qajet etetin daqyldar egý kózdelýde, dep habarlaıdy Dalanews.kz.

Prezıdenttiń Qyzylorda oblysyndaǵy egis alqaptaryn ártaraptandyrý jónindegi tapsyrmalaryn oryndaý sheńberinde sýdy az qajet etetin daqyldarǵa kóshýde. Úkimet otyrysynda sýdy utymdy paıdalaný jónindegi sharalar týraly Qyzylorda oblysynyń ákimi Nurlybek Nálibaev baıandady.

Onyń aıtýynsha bıyl Qyzylorda oblysynda barlyǵy 185,8 myń gektarǵa aýyl sharýashylyǵy daqyldaryn ornalastyrý josparlanýda. Kúrish daqyldary 70 myń gektarǵa egiledi, bul ótken jylǵy deńgeıden 10,9 myń gektarǵa az. Jalpy sońǵy 4 jylda kúrish kólemi 19 myń gektarǵa nemese 21%-ǵa qysqardy.

Qysqartylǵan kúrishtiń ornyna egisti ártaraptandyrý maqsatynda sýdy az qajet etetin daqyldar egý kózdelýde. Bul baǵytta óńirimizde quny 40 mlrd teńgege júgerini tereń óndeýge baǵyttalǵan «Qyzylorda krahmal-sirne zaýyty», quny 51 mlrd teńgege shveısarıalyq «Harvest Grýp» kompanıasynyń tehnıkalyq qarasora, júgeri, soıa ósirý jáne ony óńdeý jobasy, sý únemdeý tehnologıasymen júgeri egý jobalary júzege asyrylýda. Jobalar aıasynda bıyl júgeri daqylyn 10 myń gektarǵa ornalastyryp, aldaǵy ýaqytta da ulǵaıtý josparlanýda, - dedi óńir ákimi.