Jańaqorǵan aýdanynyń mektep-ınternatynda bastaýysh synyp muǵalimi laýazymyna jarıalanǵan konkýrs nátıjesi zańsyz dep tanyldy, dep habarlaıdy Dalanews.kz.

Atalǵan laýazymǵa bes úmitker qatysqan. Olardyń birin qabyldaý komısıasy jeńimpaz dep tanyp, jumysqa qabyldaǵan. Alaıda baıqaýǵa qatysqan taǵy bir úmitker bul sheshimmen kelispeı, sotqa júgingen. Onyń aıtýynsha, jeńimpaz dep tanylǵan adamnyń eńbek ótili nebári bir jyl bolǵan, al óz tájirıbesi men jetistikteri múlde eskerilmegen.

“Mamandandyrylǵan mejeli aýdanaralyq ákimshilik sot talapkerdiń aryzyn qanaǵattandyryp, mektep-ınternattyń qabyldaý komısıasynyń hattamasyn zańsyz dep tanyp, kúshi joıyldy. Konkýrs jeńimpazy bul sheshimge apelásıalyq shaǵym túsirgen. Qyzylorda oblystyq soty istiń mán-jaıyn zertteı kele, konkýrs buǵan deıin de ótkizilgenin, biraq uıymdastyrý barysynda buzýshylyqtar anyqtalǵan soń, ýákiletti organnyń nusqaýyna sáıkes qaıta ótkizilgenin atap ótti”, – dep habarlady oblystyq sottyń baspasóz qyzmeti.

Alaıda qaıtalama konkýrs ta zań buzýshylyqtarmen ótti. Uıymdastyrýshylar qujat qabyldaý merzimin saqtamaǵan jáne konkýrs komısıasynyń otyrysynan bir kún buryn ǵana konkýrs jarıalap, sol kúni-aq nátıjesin shyǵarǵan.

Budan bólek, sot Bilim berý salasynda sapany qamtamasyz etý komıtetine anyqtalǵan zańbuzýshylyqtar boıynsha jeke uıǵarym joldady.