Depýtat Baqytjan Bazarbek Ǵylym jáne joǵary bilim ministri Saiasat Nurbekti erekshe madaqtady. Bul qyzyq jait búgin Parlamenttiń tómengi palatasynyń plenarlyq otyrysynda boldy, - dep habarlaidy Dalanews.kz.
Ǵylym jáne joǵary bilim ministri Saiasat Nurbek Májilistiń jalpy otyrysynda baiandama jasady. Al keiin depýtattar oǵan suraqtar qoia bastady.
Suraq qoiǵandardyń ishinde depýtat Baqytjan Bazarbek te boldy. Ol aldymen Saiasat Nurbektiń sóileý mánerin maqtady.
"Shirkin bizdiń ministrlerimiz siz siiaqty qyzyl til, sýyryp salma sheshen bolsa, barlyq suraqqa jaýap bolar edi. Qazir sizdi tyńdap otyrmyz, ádemi óleń siiaqty", - dedi depýtat.
Bul maqtaý zalda otyrǵandardy kúlkige qarq qylǵanymen, ministrdiń ózi eshqandai emotsiia kórsetpegen.
Aita keteiik, buǵan deiin Baqytjan Bazarbek qurylys salasyna qatysty Qurylys kodeksi zań jobasynyń tanystyrylymynda bul iske jaýapty organdardy ashyq synaǵan edi.
Depýtattyń sózinshe, kodekste eshqandai jańalyq joq.
"Timýr Jienbaevichke osy ýaqytqa deiin syndy aityp keldim. Aldymyzda Qurylys kodeksi. Bul 177 bet, 34 bólim, 200 baptan turady. Ministrliktiń qosqany 3-4 bólim ǵana. Qalǵandary sáýlet, qala qurylysy týraly zań, jeke turǵyn úi qurylysy týraly zań jáne úlestik qatysý. Bul zań jobasynda eshqandai jańalyq joq. Basqasha aitqanda, úsh zańdy qosyp-qosyp, bir zań retinde kirgize salǵan. "Kúsheittik" deidi. ..."Jańa zań" deidi. Eshqandai jańa zań joq", - dedi depýtat.
Sonymen qatar, depýtat Almatyda kóshkinde qaza tapqan otbasyn eske alyp, bul máselege qatysty da eshqandai ózgeris joǵyn ashyq aitty. Onyń sózinshe, bul jerler qoǵamdyq orynǵa jatady. Baqytjan Bazarbek túptep kelgende 2000-jyldary qurylys salýshylardyń múddesin qorǵaǵan zań sol kúiinde qalǵanyn aitty.
"Qurylys kodeksi jańa dep bos úmitke senbeńizder! Bul jerde jańa eshteńe de joq. ...Myna kodeksti 10-synyptyń oqýshysy jaza alady. 1-kýrstyń stýdentin aitpaǵanda. Bul - referat, kýrstyq jumys. Ony bizge Qurylys kodeksi retinde ákelip otyr. Bul - bar bolǵany 200 bettik aq qaǵaz. ...Stilistikalyq, grammatikalyq, orfografiialyq qatelerdi aitpai-aq qoiaiyn. 3-kýrstyń stýdenti mundai qate jibermeidi", - deidi ol.
