Qazaqstanda qyz alyp qashqany úshin jaza qarastyrylýy múmkin, dep habarlaidy Dalanews.kz.
Májilis depýtaty Murat Ábenovtiń aitýynsha, keiingi úsh jylda Qazaqstanda nekege májbúrleý boiynsha 214 shaǵym tirkelgen. Alaida olardyń 10-y ǵana sotqa jetken. Qalǵan qylmystyq ister jabýly kúiinde qalǵan.
"Qyz urlap áketkenin, kólikten sekirip túskenin, kúsh qoldanylǵanyn dáleldese de, eshteńe istei almady", – dedi Ábenov Májilis dálizinde.
Parlament depýtattary jaqyn arada Májiliste qaralatyn túzetýler ázirlegen. Olar Qazaqstanda "qyz urlaý" úshin jaza engizýdi usynady. Bul resmi túrde "nekege májbúrleý" dep atalmaq.
"Biz túzetýdi durys atadyq jáne barlyq jaǵdaidy qarastyryp jatyrmyz. Tolyǵyraq naqtylanady, biraq onda eleýli aiyppul salynady. Ákimshilik jaýapkershilik bar, al eger qyz 18 jasqa tolmaǵan bolsa nemese kúsh qoldanylǵan jaǵdaida, ne bir top adam qatysqan bolsa, onda qatań jaýapkershilik bolady, tipti 5–7 jylǵa deiin bas bostandyǵynan aiyrý jazasy qarastyrylady", – dedi depýtat.
