Tamyzdyń tórti kúni biz, QazUÝ stýdentteri, aspan asty eliniń astanasy Beijińge ushyp kelip, áýejaidyń tabaldyryǵynan attap úlgermei, Pekin til jáne mádeniet (BLCU) ýniversiteti tarapynan jyly qarsy alyndyq. Sol kúni-aq, olar bizdi Uly Qytai qorǵanyn kórýge apardy. Búgingi kúnge deiin jaqsy saqtalǵan álem keremetteriniń ishine kiretin tarihi murany sońyna deiin óz kózimmen kórip otyrǵanyma senbedim. Kelesi kúnder de maǵan dál osyndai tátti tús tárizdi sezildi. Tek kitaptardan kórýge bolǵan jumaq tárizdes imperatordyń jazǵy saraiyna (颐和园), kórkemfilmderden ǵana tamashalai alatyn tyiym salynǵan qala (故宫), MaoZy Doń QHR týyn jelbiretken Tiiannanmyn alańy sekildi tarihi mańyzdy, kórikti jerlerge de bardyq. Beijińde sonymen qosa bizge qytai tili, kalligrafiiany úirený sabaqtary, Qytai tarihy men mádenieti, filosofiiasy dáristeri ótkizildi. Oqytýshylardyń bizge degen jyly peiilderi tańǵalarlyq boldy. Osylaisha Beijińde ótkizgen árbir ýaqytym keremet ótti. Sodan soń Qytaidyń modern qalasy Shanhaiǵa bet aldyq. Munda biz Hýanpý ózenin kememen kezip, túngi Shanhai kórinisine tánti boldyq, Shanhaidyń biik telemunarasyna kirip kórdik, jáne de sonyń ishindegi balaýyz figýralar murajaiyna bardyq, sosyn Pýdýn kvartalynda da serýendedep úlgerdik. Alaida biz záýlim ǵimaratqa, osy zamanǵa sai salynǵan kórikti jerlerge lyq toly alyp shahardy kórip qana qoimai, sonymen qosa tarihi qundy oryndarǵa da bardyq. Máselen, ejelgi qalashyq 朱家角, Shanhai qalalyq murajaiy t.b. Al úshinshi aialdama – Chińdaoda meniń bala kezimnen bergi armanym oryndaldy: men alǵash ret teńizdi kórdim. Bul áserli sátti men eshqashan umytpaspyn.
Osyndai qyzyqqa toly kezderdi bastan keshirgenime úlken jaǵdai jasaǵan QazUÝ-ǵa alǵys aitýǵa eshbir sharshamaspyn.
Qairat Aidana, QazUÝ Shyǵystaný fakýltetiniń 3 kýrs stýdenti
Sharypqazy Nurtálip, QazUÝ Shyǵystaný fakýltetiniń oqytýshysy
