Búgin Qytai astanasy Beijińde Qazaqstannyń alǵashqy mádeni ortalyǵy ashyldy. Onyń saltanatty ashylýy Memleket basshysy Qasym-Jomart Toqaevtyń resmi sapary aiasynda ótti, dep habarlaidy Dalanews.kz "24.kz"-ke silteme jasap.
Jańa mádeni ortalyq Beijińniń Chaoian aýdanynda ornalasqan. Bul – Qasym-Jomart Toqaev pen QHR tóraǵasy Si Tszinpinniń kelisimi nátijesinde júzege asqan birlesken joba. Qazaqstan tarapynyń bastamasy – kórshiles elder arasyndaǵy mádeni bailanystardy nyǵaityp, óner men dástúrdi keńinen nasihattaýǵa baǵyttalǵan.
Aýmaǵy 620 sharshy metrdi quraityn ortalyqta kitaphana, kontsertter men lektsiialarǵa arnalǵan zal, qazaq tili men mýzyka kabinetteri bar. Munda elimizdiń týristik áleýeti de tanystyrylady. Kórme zalynda saq dáýirinen bastap búginge deiingi 100-den astam tarihi jádiger qoiylǵan. Olardyń qatarynda Esik pen Berel qorǵandarynan tabylǵan artefaktiler, ulttyq mýzykalyq aspaptar, zergerlik áshekeiler jáne turmystyq buiymdar bar.
QR Mádeniet jáne aqparat ministri Aida Balaeva ortalyqtyń ashylýy qazaq mádenietin Qytaida keńinen nasihattaýǵa múmkindik beretinin atap ótti.
«Bul jerde qazaq tilin úiretý, dombyra úiretý synyptary ashylady. Qazaqtyń mádenieti men dástúrine qyzyǵýshylyq tanytqan qytailyqtar úshin úlken múmkindik týady», – dedi ministr.
Ashylý saltanaty barysynda Qazaqstannyń mádenieti men tabiǵatyn tanystyratyn mýltimediialyq stend, kitaphana jáne shyǵarmashylyq kabinetter tanystyryldy. Sondai-aq Abaidyń shyǵarmalarynyń tusaýkeseri ótti.
