بٷگٸن قىتاي استاناسى بەيجٸڭدە قازاقستاننىڭ العاشقى مەدەني ورتالىعى اشىلدى. ونىڭ سالتاناتتى اشىلۋى مەملەكەت باسشىسى قاسىم-جومارت توقاەۆتىڭ رەسمي ساپارى اياسىندا ٶتتٸ, دەپ حابارلايدى Dalanews.kz "24.kz"-كە سٸلتەمە جاساپ.
جاڭا مەدەني ورتالىق بەيجٸڭنٸڭ چاويان اۋدانىندا ورنالاسقان. بۇل – قاسىم-جومارت توقاەۆ پەن قحر تٶراعاسى سي تسزينپيننٸڭ كەلٸسٸمٸ نەتيجەسٸندە جٷزەگە اسقان بٸرلەسكەن جوبا. قازاقستان تاراپىنىڭ باستاماسى – كٶرشٸلەس ەلدەر اراسىنداعى مەدەني بايلانىستاردى نىعايتىپ, ٶنەر مەن دەستٷردٸ كەڭٸنەن ناسيحاتتاۋعا باعىتتالعان.
اۋماعى 620 شارشى مەتردٸ قۇرايتىن ورتالىقتا كٸتاپحانا, كونتسەرتتەر مەن لەكتسييالارعا ارنالعان زال, قازاق تٸلٸ مەن مۋزىكا كابينەتتەرٸ بار. مۇندا ەلٸمٸزدٸڭ تۋريستٸك ەلەۋەتٸ دە تانىستىرىلادى. كٶرمە زالىندا ساق دەۋٸرٸنەن باستاپ بٷگٸنگە دەيٸنگٸ 100-دەن استام تاريحي جەدٸگەر قويىلعان. ولاردىڭ قاتارىندا ەسٸك پەن بەرەل قورعاندارىنان تابىلعان ارتەفاكتٸلەر, ۇلتتىق مۋزىكالىق اسپاپتار, زەرگەرلٸك ەشەكەيلەر جەنە تۇرمىستىق بۇيىمدار بار.
قر مەدەنيەت جەنە اقپارات مينيسترٸ ايدا بالاەۆا ورتالىقتىڭ اشىلۋى قازاق مەدەنيەتٸن قىتايدا كەڭٸنەن ناسيحاتتاۋعا مٷمكٸندٸك بەرەتٸنٸن اتاپ ٶتتٸ.
«بۇل جەردە قازاق تٸلٸن ٷيرەتۋ, دومبىرا ٷيرەتۋ سىنىپتارى اشىلادى. قازاقتىڭ مەدەنيەتٸ مەن دەستٷرٸنە قىزىعۋشىلىق تانىتقان قىتايلىقتار ٷشٸن ٷلكەن مٷمكٸندٸك تۋادى», – دەدٸ مينيستر.
اشىلۋ سالتاناتى بارىسىندا قازاقستاننىڭ مەدەنيەتٸ مەن تابيعاتىن تانىستىراتىن مۋلتيمەدييالىق ستەند, كٸتاپحانا جەنە شىعارماشىلىق كابينەتتەر تانىستىرىلدى. سونداي-اق ابايدىڭ شىعارمالارىنىڭ تۇساۋكەسەرٸ ٶتتٸ.
