Qytai biligi buryn-sońdy bolmaǵan chikýngýnia virýsynyń órshýine tap boldy. Dúniejúzilik densaýlyq saqtaý uiymy dabyl qaqqan indet eldiń materiktik bóliginde birinshi ret tirkelip otyr dep jazady Dalanews.kz.
7 tamyzdaǵy jaǵdai boiynsha, aýrý juqtyrǵandar sany jeti myńnan asqan, olardyń basym bóligi ónerkásiptik Foshan qalasynyń turǵyndary. Oksford ýniversitetiniń mamandary muny Qytaida buǵan deiin tirkelgen chikýngýnia indetiniń eń irisi dep málimdedi.
Infektsiia juqqan masanyń shaǵýy arqyly tarap, dene qyzýyn kóteredi jáne býyndardy qatty aýyrtady. Aýrýdyń sońy uzaq merzimdi múgedektikke ulasýy yqtimal.
Qytai halqynda atalǵan virýsqa qarsy qalyptasqan immýnitettiń joqtyǵy jaǵdaidy odan saiyn ýshyqtyryp tur.
Indetti aýyzdyqtaý úshin bilik jerden de, dron arqyly áýeden de insektitsidter shashyp, sý toqtaǵan jerlerdi qurǵatyp, masaǵa qarsy torlar ornatýda. Belgilengen talaptardy oryndamaǵandarǵa 10 myń iýanǵa (shamamen 1,4 myń dollar) deiin aiyppul salý, tipti elektr qýatynan ajyratý sekildi qatań sharalar engizilgen.
Naýqastar kem degende bir apta merzimge statsionarda oqshaýlanady. Indettiń alǵashqy kúnderi eki aptalyq úi karantini jariialanǵan edi, alaida virýs adamnan adamǵa juqpaityndyqtan, keiin bul sheshimniń kúshi joiyldy.
Aýrýdyń taralýyna tosqaýyl qoiý maqsatynda erekshe ádister de qoldanysqa engizilgen. Máselen, sý qoimalaryna masa dernásilderin jeitin balyqtar jiberilip, virýs tasymaldaýshylardyń popýliatsiiasyn baqylaý úshin jyrtqysh masalar paidalanylýda.
Buǵan deiin DDSU chikýngýnianyń jahandyq indetke ainalý qaýpi týraly eskertken bolatyn. Úndi muhitynyń araldarynda bastalǵan dert Eýropa, Afrika jáne Aziiany da sharpyp úlgerdi.
