Qytai jankúierleri Dimashqa ne syilady?
Jankúierler oǵan syilyqtardy kúndelikti úiip-tógip ákeletin kórinedi. Olardyń arasynda dámdi taǵamdar, Dimashtyń sýreti beinelengen zattar, kiimder bar. Qazaqstandyq jas ánshiniń ónerine tánti Qytai halqy Louis VUTTION men ARMANI syndy sán úileriniń qymbat buiymdaryna da aqshalaryn aiamaýda.
Bul týraly Instagramdaǵy óz paraqshasynda Dimash Qudaibergenovtiń dosy ári resmi ókili Alpamys Shárimov jazdy.
– Syilyq alǵandy kim de bolsa unatady! Týǵan kún, jańa jyl, ia bolmasa Naýryzda syilyq alysyp-berisý bizdiń dástúrde bar. Qytailyq fanattar súiikti ánshisiniń ár kúni mereke bolsyn degen nietpen kúnige kóptegen syilyqtar jiberedi. Bul Dimashqa tek bir kúnde kelgen syilyqtar, kóbi myna sýretke túspei qaldy. Syilyqtardyń deni tátti dámder, erekshe eskertkish syilyqtardan bastalyp Louis VUTTION, ARMANI syndy brendterdiń qundy aksessýarlaryna deiin jalǵasady... Ushaqta demalatyn jastyq, "Dimash" jazýy bar breloktar men fýtbolkalar, biz múldem túsinbeitin birdemeler de kezdesedi! Rasymen de, óner adamy úshin osyndai kóńil bólý shabyttandyrady! Qonaq úige kelip syilyqtardy retteý, Dimashqa xattardy oqyp berý meniń mindetim! Hattar demekshi... Hattar ártúrli tilde keledi! Aǵylshynsha, frantsýzsha, qytai tilinde, oryssha... Biraq, deni qazaq tilinde! Qateler bar! Biraq, aýdarmashymen qinalmaý úshin qazaq tilinde jazylǵan, oqýǵa ońai, tez!, – dep jazdy ol.
Alpamys Shárimov Dimashtyń atynan barlyq jankúierlerge alǵysyn aityp, jyly sóz ben bir sáttik kóńil oǵan erekshe áser syilaitynyn jetkizdi. Aita keteiik, Qytai telearnasyndaǵy «Singer 2017» án baiqaýyna qatysyp jatqan otandasymyz onyń eki kezeńinde – birinshi, úshinshisinde 3-oryn alyp, jobaǵa qatysýyn jalǵastyryp keledi. Onyń qytailyq áleýmettik jelidegi jazýshylar sany millionnan asty, oǵan aqyndar óleń-jyrlar arnap, qyzdar qazaqsha úirenip, hattar jazýda. Jankúierler óz paraqshalaryn Dimashtyń sýretterine toltyrýda. Tipti, Qytai dúkenderinde otandasymyzdyń kelbeti beinelengen buiymdar, turmystyq zattar satyla bastaǵan. Dimashtyń ónerine tánti bolǵan álemge tanymal ánshi Lara Fabian onymen kezdeskisi keletinin aitty. Al kúni keshe ǵana belgili akter, kinorejisser Djeki Chan D.Qudaibergenovti kezdesýge shaqyryp, áńgimelesken bolatyn.
