"2020 jyldyń 19 qazanynda Bas prokýratýraǵa sotty bolǵan Aqjarqyn Turlybaidyń ózin Qazaqstanǵa aýystyrý týraly jazbasha ótinimi túsken bolatyn. Sol kúni-aq Qytai tarabyna tiisti saýal joldandy. QHR Ádilet ministrliginiń 2021 jylǵy 3 naýryzdaǵy jaýabyna sáikes, Aqjarqyn Turlybaidy Qazaqstanǵa aýystyrýdan bas tartylǵan.
Onyń shartty túrde merziminen buryn bosatý quqyǵynsyz ómir boiyna bas bostandyǵynan aiyrý jazasyna kesilgenin eskerip, osynda sheshim qabyldanǵany aitylǵan", - dep jazylǵan bas prokýratýranyń málimetinde.
Bunymen qosa prokýror qazaqstandyq tarap Turlybaidy Qazaqstanǵa aýystyrýǵa úmitin úzbeitinin, eger Qytai soty sottalýshynyń jazasyn qysqartyp, jazany óteýdiń naqty ýaqytyn taǵaiyndasa, bári múmkin ekenin aitty.
"QHR-daǵy QR Elshiligi qoldanystaǵy zańǵa sáikes Aqjarqyn Turlybaidyń jaza merzimin qysqartý úkim zańdy kúshine engen sátten 2-3 jyl ótkennen keiin múmkin bolatynyn aitty. Bul másele turaqty baqylaýda, A.Turlybaiǵa qatysty jaza jeńildese ne jazanyń naqty merzimi aitylsa Bas prokýratýra ony Qazaqstanǵa aýystyrý týraly qaitadan suraý salýǵa bastamashylyq jasaidy", - dedi Qoigeldiev.
Bas prokýratýrada Qazaqstan Respýblikasynyń sottalǵan azamattaryn elge qaitarý sondai-aq odan bas tartý sharttary 22.02 2011 jylǵy Qazaqstan Respýblikasy men Qytai Halyq Respýblikasy arasyndaǵy Sottalǵan adamdardy berý týraly shartta kózdelgenin atap ótti (20.11.2013 jylǵy QR Zańymen ratifikatsiialanǵan, 30.09.2015 jyly zańdy kúshine engen).
Qazaqstandyq stýdent Aqjarqyn Turlybai Qytaidyń Gýanchjoý qalasynyń áýejaiynda 2014 jyldyń naýryz aiynda ustaldy.
Ol tanystarynyń aitýy boiynsha, Almatydan Qytaiǵa attanǵan. Olar qyzǵa Gýanchjoýdan Malaiziiaǵa brend kiimderin tasymaldaýyn ótinip, sol úshin qomaqty qarajat tóleimiz dep ýáde etken.
Boijetken Gýanchjoý áýejaiynan ushyp bara jatqanda ustaldy. Onyń sómkesinde esirtki tabyldy. Aqjarqyn esirtki týraly múlde bilmeitinin málimdedi. Ol óz kinásin moiyndamady. Nigeriialyq esirtki trafigin uiymdastyrýshylar áli ustalǵan joq.
2015 jyldyń maýsymynda Gýandýn soty Qazaqstan azamatshasyn ómir boiyna bas bostandyǵynan aiyrdy. 2018 jyly sot isti qaita qaraýǵa jiberdi. Alaida keiinirek ony ómir boiyna bas bostandyǵynan aiyrý jazasy týraly sot úkimi ózgerissiz qaldy. Appeliatsiialyq instantsiia 2020 jyldyń tamyz aiynda Aqjarqyn Turlybaidyń úkimin taǵy da ózgerissiz qaldyrdy.
