Mereıtoılyq sharanyń mán-mańyzyna Memlekettik hatshy Qyrymbek Kósherbaev óz sózinde keńinen toqtaldy. «Muqaǵalı – jyrdyń asyl qazynasy. Ol – ótken men jańanyń arasyn jalǵaǵan altyn kópir. Elbasy men Prezıdenttiń bastamasymen aqynnyń ǵasyrlyq toıyn IýNESKO kóleminde ótkizýge usynystar daıyndalýda. Búgingi toı qutty bolsyn. Halqymyzdyń rýhy Muqaǵalı jyrlaryndaı taza, Hantáńirindeı asqaq, Kólsaıdaı kórikti bolsyn» degen Qyrymbek Kósherbaev Prezıdent Qasym-Jomart Toqaevtyń arnaıy quttyqtaýyn oqyp, tabystady.
Munan soń Mádenıet jáne sport mınıstri Aqtoty Raıymqulova, Jazýshylar odaǵynyń tóraǵasy, aqyn Ulyqbek Esdáýlet, TÚRKSOI uıymynyń ókili Atageldi Kúltegin Muqaǵalıdyń - qazaqtyń ǵana emes, tutas túrki áleminiń, adamzattyń aqyny ekenin tilge tıek etip, toıdyń rýhanı mańyzyn erekshe atap ótti.
Oblys ákimi Amandyq Batalov shekaralyq aımaqqa kórsetilgen qoldaýlarǵa toqtaldy:
– Aqıyq aqynymyz Muqaǵalıdyń 90 jyldyq mereıtoıy úlken deńgeıde atalyp ótilýde. Prezıdent toıǵa óz quttyqtaýyn, kópshilikke ystyq sálemin joldady. Elbasynyń qoldaýymen 2 aýdandy bólý arqyly Raıymbek aýdanynyń qaıta qurylyp, búginde gúldenip jatqanyn maqtanyshpen aıtamyz. Bul – Táýelsizdiktiń jemisi. Qazir shekaralyq aýmaqtaǵy aýyl turǵyndarynyń ómir súrý jaǵdaıy jaqsaryp keledi, qanshama jańa nysandar boı kóterdi, jańa úıler salyndy. 500-den astam otbasy Narynqolǵa qaıta kóship keldi. 2 jarym myń jas týǵan jerine oraldy. Muqaǵalıdaı aqyny bar qazaq halqy baqytty. Aqynnyń rýhy jas urpaqty qoldap júrsin. Elimiz aman, jurtymyz tynysh, táýelsizdigimiz tuǵyrly bolsyn, – dedi Amandyq Batalov.
Parlament depýtaty, aqyn Maqpal Mysa, Muqaǵalıdyń uly Juldyz Maqataev aqyn rýhyna arnap óz óleńderin oqydy. Budan ári mereıtoı Ortalyq alańda aqynnyń sózine jazylǵan ánderdiń Gala konsertimen jalǵasty.
Atap ótsek, eskertkishti daıyndaýǵa oblystyq búdjetten 61,1 mıllıon teńge jumsaldy. Jumysty merdiger uıym "Taıqazan" JSHS atqardy. Eskertkish qoladan quıylǵan, tuǵyry granıtten daıyndalǵan. Jalpy eskertkishtiń bıiktigi – 8,2 metr, avtory – sáýletshi A.Rústembekov, músinshisi – Q.Kákimov.
Sondaı-aq osy kúni Narynqol aýylynda 50 otbasy baspanaly boldy. Jańa qonys ıelerine turǵyn úı kiltteri saltanatty jaǵdaıda tapsyryldy. Narynqol aýylynda salyna bastaǵan 83 úıdiń 33-i buǵan deıin tapsyrylǵan bolatyn. Al búgin jobanyń 3 jáne 4-shi kezeńderi aıaqtalyp, 50 úı berilip otyr.
Jalpy Muqaǵalı Maqataevtyń 90 jyldyq mereıtoıyna daıyndyqqa Almaty oblysy ótken jyldan kirisken edi. Mereıtoıdy ótkizýge jergilikti búdjetten qomaqty qarjy bólindi. Aıtýly sharaǵa oraı qurylǵan arnaıy jumys tobyn oblys ákimi Amandyq Batalov ózi basqaryp, ázirlikti qurylys jáne kórkeıtý jumystarynan bastaǵan, ári olardyń sapaly atqarylýyn nazarda ustady.
Aldyn ala daıyndyq barysynda Qarasaz aýylyndaǵy aqyn mýzeıine, mádenıet úıine, A.Barmanbekuly atyndaǵy orta mektepke jóndeý jumystary jasalyp, nysandar jańa keıipke endi. Eldi mekenniń ortalyq kósheleri, ortalyq alańy abattandyrylyp, kóshe shamdary ornatyldy. Aýyz sý júıesi "Aýyl - el besigi" baǵdarlamasynyń aıasynda respýblıkalyq búdjetten bólingen 427,1 mıllıon teńgege qaıta jańǵyrtýdan ótkizilip jatyr. Qarasaz aýylynda óner mektebin salý da - mereıtoı aıasyndaǵy mańyzdy bastamalardyń biri. Qazir nysannyń jobalyq-smetalyq qujattary ázirlenýde. Aýylǵa kireberistegi Jastar saıabaǵy abattandyryldy. İrgeles Saryjaz aýylynda Raıymbek batyr eskertkishiniń mańy kórkeıtilip, eskertkish janyndaǵy sý júıesi jóndeýden ótti, aýyldyń ortalyq kósheleri kóz súısiner keıipke keltirildi.
Bıylǵy jyly 3 gektar aýmaǵy bar Muqaǵalı atyndaǵy jańa saıabaqtyń qurylysy bastaldy. Quny 374,5 mıllıon teńgelik jobada konserttik sahna, shaǵyn fýtbol alańy, balalar alańy, vorkaýt sport alańy, aleıa, demalys aımaǵy qarastyrylǵan. Sol sıaqty aýdandyq ákimdik ǵımaratynyń janynan shaǵyn saıabaq salyna bastady. Al aýdandyq mádenıet úıiniń aldyndaǵy skver men ortalyq saıabaq tolyq abattandyryldy.
