مەرەيتويلىق شارانىڭ ءمان-ماڭىزىنا مەملەكەتتىك حاتشى قىرىمبەك كوشەربايەۆ ءوز سوزىندە كەڭىنەن توقتالدى. «مۇقاعالي – جىردىڭ اسىل قازىناسى. ول – وتكەن مەن جاڭانىڭ اراسىن جالعاعان التىن كوپىر. ەلباسى مەن پرەزيدەنتتىڭ باستاماسىمەن اقىننىڭ عاسىرلىق تويىن يۋنەسكو كولەمىندە وتكىزۋگە ۇسىنىستار دايىندالۋدا. بۇگىنگى توي قۇتتى بولسىن. حالقىمىزدىڭ رۋحى مۇقاعالي جىرلارىنداي تازا، حانتاڭىرىندەي اسقاق، كولسايداي كورىكتى بولسىن» دەگەن قىرىمبەك كوشەربايەۆ پرەزيدەنت قاسىم-جومارت توقايەۆتىڭ ارنايى قۇتتىقتاۋىن وقىپ، تابىستادى.
مۇنان سوڭ مادەنيەت جانە سپورت ءمينيسترى اقتوتى رايىمقۇلوۆا، جازۋشىلار وداعىنىڭ ءتوراعاسى، اقىن ۇلىقبەك ەسداۋلەت، تۇركسوي ۇيىمىنىڭ وكىلى اتاگەلدى كۇلتەگىن مۇقاعاليدىڭ - قازاقتىڭ عانا ەمەس، تۇتاس تۇركى الەمىنىڭ، ادامزاتتىڭ اقىنى ەكەنىن تىلگە تيەك ەتىپ، تويدىڭ رۋحاني ماڭىزىن ەرەكشە اتاپ ءوتتى.
وبلىس اكىمى اماندىق باتالوۆ شەكارالىق ايماققا كورسەتىلگەن قولداۋلارعا توقتالدى:
– اقيىق اقىنىمىز مۇقاعاليدىڭ 90 جىلدىق مەرەيتويى ۇلكەن دەڭگەيدە اتالىپ وتىلۋدە. پرەزيدەنت تويعا ءوز قۇتتىقتاۋىن، كوپشىلىككە ىستىق سالەمىن جولدادى. ەلباسىنىڭ قولداۋىمەن 2 اۋداندى ءبولۋ ارقىلى رايىمبەك اۋدانىنىڭ قايتا قۇرىلىپ، بۇگىندە گۇلدەنىپ جاتقانىن ماقتانىشپەن ايتامىز. بۇل – تاۋەلسىزدىكتىڭ جەمىسى. ءقازىر شەكارالىق اۋماقتاعى اۋىل تۇرعىندارىنىڭ ءومىر ءسۇرۋ جاعدايى جاقسارىپ كەلەدى، قانشاما جاڭا نىساندار بوي كوتەردى، جاڭا ۇيلەر سالىندى. 500-دەن استام وتباسى نارىنقولعا قايتا كوشىپ كەلدى. 2 جارىم مىڭ جاس تۋعان جەرىنە ورالدى. مۇقاعاليداي اقىنى بار قازاق حالقى باقىتتى. اقىننىڭ رۋحى جاس ۇرپاقتى قولداپ ءجۇرسىن. ەلىمىز امان، جۇرتىمىز تىنىش، تاۋەلسىزدىگىمىز تۇعىرلى بولسىن، – دەدى اماندىق باتالوۆ.
پارلامەنت دەپۋتاتى، اقىن ماقپال مىسا، مۇقاعاليدىڭ ۇلى جۇلدىز ماقاتايەۆ اقىن رۋحىنا ارناپ ءوز ولەڭدەرىن وقىدى. بۇدان ءارى مەرەيتوي ورتالىق الاڭدا اقىننىڭ سوزىنە جازىلعان اندەردىڭ گالا كونسەرتىمەن جالعاستى.
اتاپ وتسەك، ەسكەرتكىشتى دايىنداۋعا وبلىستىق بيۋدجەتتەن 61،1 ميلليون تەڭگە جۇمسالدى. جۇمىستى مەردىگەر ۇيىم "تايقازان" ج ش س اتقاردى. ەسكەرتكىش قولادان قۇيىلعان، تۇعىرى گرانيتتەن دايىندالعان. جالپى ەسكەرتكىشتىڭ بيىكتىگى – 8،2 مەتر، اۆتورى – ساۋلەتشى ا.رۇستەمبەكوۆ، ءمۇسىنشىسى – ق.كاكىموۆ.
سونداي-اق وسى كۇنى نارىنقول اۋىلىندا 50 وتباسى باسپانالى بولدى. جاڭا قونىس يەلەرىنە تۇرعىن ءۇي كىلتتەرى سالتاناتتى جاعدايدا تاپسىرىلدى. نارىنقول اۋىلىندا سالىنا باستاعان 83 ءۇيدىڭ 33ء-ى بۇعان دەيىن تاپسىرىلعان بولاتىن. ال بۇگىن جوبانىڭ 3 جانە 4ء-شى كەزەڭدەرى اياقتالىپ، 50 ءۇي بەرىلىپ وتىر.
جالپى مۇقاعالي ماقاتايەۆتىڭ 90 جىلدىق مەرەيتويىنا دايىندىققا الماتى وبلىسى وتكەن جىلدان كىرىسكەن ەدى. مەرەيتويدى وتكىزۋگە جەرگىلىكتى بيۋدجەتتەن قوماقتى قارجى ءبولىندى. ايتۋلى شاراعا وراي قۇرىلعان ارنايى جۇمىس توبىن وبلىس اكىمى اماندىق باتالوۆ ءوزى باسقارىپ، ازىرلىكتى قۇرىلىس جانە كوركەيتۋ جۇمىستارىنان باستاعان، ءارى ولاردىڭ ساپالى اتقارىلۋىن نازاردا ۇستادى.
الدىن الا دايىندىق بارىسىندا قاراساز اۋىلىنداعى اقىن مۋزەيىنە، مادەنيەت ۇيىنە، ا.بارمانبەك ۇلى اتىنداعى ورتا مەكتەپكە جوندەۋ جۇمىستارى جاسالىپ، نىساندار جاڭا كەيىپكە ەندى. ەلدى مەكەننىڭ ورتالىق كوشەلەرى، ورتالىق الاڭى اباتتاندىرىلىپ، كوشە شامدارى ورناتىلدى. اۋىز سۋ جۇيەسى "اۋىل - ەل بەسىگى" باعدارلاماسىنىڭ اياسىندا رەسپۋبليكالىق بيۋدجەتتەن بولىنگەن 427،1 ميلليون تەڭگەگە قايتا جاڭعىرتۋدان وتكىزىلىپ جاتىر. قاراساز اۋىلىندا ونەر مەكتەبىن سالۋ دا - مەرەيتوي اياسىنداعى ماڭىزدى باستامالاردىڭ ءبىرى. ءقازىر نىساننىڭ جوبالىق-سمەتالىق قۇجاتتارى ازىرلەنۋدە. اۋىلعا كىرەبەرىستەگى جاستار ساياباعى اباتتاندىرىلدى. ىرگەلەس سارىجاز اۋىلىندا رايىمبەك باتىر ەسكەرتكىشىنىڭ ماڭى كوركەيتىلىپ، ەسكەرتكىش جانىنداعى سۋ جۇيەسى جوندەۋدەن ءوتتى، اۋىلدىڭ ورتالىق كوشەلەرى كوز سۇيسىنەر كەيىپكە كەلتىرىلدى.
بيىلعى جىلى 3 گەكتار اۋماعى بار مۇقاعالي اتىنداعى جاڭا ساياباقتىڭ قۇرىلىسى باستالدى. قۇنى 374،5 ميلليون تەڭگەلىك جوبادا كونسەرتتىك ساحنا، شاعىن فۋتبول الاڭى، بالالار الاڭى، ۆوركاۋت سپورت الاڭى، اللەيا، دەمالىس ايماعى قاراستىرىلعان. سول سياقتى اۋداندىق اكىمدىك عيماراتىنىڭ جانىنان شاعىن ساياباق سالىنا باستادى. ال اۋداندىق مادەنيەت ءۇيىنىڭ الدىنداعى سكۆەر مەن ورتالىق ساياباق تولىق اباتتاندىرىلدى.
