Qazaqstandyq BTA Bankiniń burynǵy qojaıyny Muhtar Áblázov bostandyqqa shyqqan soń fransıalyq Liberation gazetine bergen suhbatynda 2005 jyly Qyrǵyzstandaǵy "qyzǵaldaq revolúsıasyn" qarjylandyrǵanyn málimdedi. Áblázov ózin qýdalaýdyń tek qana saıası astary bar ekenin aıtty. Saıası qyzmeti retinde ol Qyrǵyzstandaǵy oqıǵalardy mysalǵa aldy.
"2005 jyldyń basynda men Qyrǵyzstandaǵy rejımdi qulatýǵa yqpal etý úshin sondaǵy opozısıany qarjylandyrdym. Men úshin bul óte mańyzdy boldy, óıtkeni postsovettik respýblıkalardyń birinde demokratıalyq proses bastalýy kerek edi, respýblıka durys reformalar júrgize bildi", - degen saıasatker sózin forbes.kz jarıalady.
Qazaqstandyq burynǵy bankır jáne oppozısıoner Muhtar Áblázov fransýz túrmesinen 10 jeltoqsanda shyqty. Ol túrmede 2013 jyldyń jazynan beri otyrdy. Áblázovtyń bostandyqqa shyǵýyna Fransıa Memlekettik keńesiniń ony Reseıge ekstradısıalaý týraly buıryqtyń kúshin joıý jónindegi sheshimi sebep boldy.
Áblázov otanynda sátti kásipker boldy, 1990-jyldardyń sońynda úkimette jumys istedi, energetıka, ındýstrıa jáne saýda mınıstri boldy. 2001 jyly ol "Qazaqstannyń demokratıalyq tańdaýy" opozısıalyq qozǵalysynyń negizin qalaýshylardyń biri boldy. 2002 jyly qazaqstandyq sot ony qyzmet babyn asyra paıdalandy degen aıyppen alty jylǵa sottady. Áblázov 2003 jyly bosap shyqty, saıasatpen aınalyspaımyn degen ýádesinen soń raqymshylyqqa ilikti. 2005 jyly BTA Bankiniń dırektorlar keńesiniń tóraǵasy atandy, 2009 jyly bılik bankti memlekettendirý týraly jarıalaǵanǵa deıin sony basqardy. Áblázovqa qarsy sotqa aryz túsken soń ol elden qashyp shyǵyp, Ulybrıtanıadan saıası baspana aldy. Keıin Qazaqstan atynan brıtandyq sotqa Áblázovqa qarsy shaǵym túsirilip, onyń keıbir aktıvteri qulyptaldy.
2012 jyly brıtandyq sot Áblázovty qarjy aktıvterine qatysty jalǵan aqparat berdi degen qorytyndymen 22 aıǵa sottady, odan soń ol Ulybrıtanıadan ketip qaldy.
