Qyrǵyzstannyń Osh qalasynda bolǵan sel saldarynan joǵalyp ketken 7 jasar qyzdyń denesi Ózbekstan aýmaǵynan tabyldy, dep habarlaidy Dalanews.kz.
Qyrǵyzstan tótenshe jaǵdailar ministrliginiń málmetinshe, Ándijan qalasyndaǵy (Ózbekstan Respýblikasy) Shahrihonsoi sýarý kanalynan 2017 jyly týǵan qyzdyń máiiti tabyldy.
Onyń denesi "Dostyq" shekarasy arqyly qyrǵyz tarapyna berildi. Joǵalǵan eki áiel men eki qyzdy izdeý jumystary jalǵasýda.
Eske salaiyq, 28 maýsymda Qyrǵyzstanda nóser jaýyn-shashyn jaýyp, Osh oblysynyń Nookat aýdanynda joiqyn sel tasqyny ótip, onyń saldarynan turǵyndar men týrister zardap shekti.
Sońǵy málimetter boiynsha, toǵyz adam qaza tapty, onyń tórteýi – qazaqstandyq bala. Qaiǵyly oqiǵa bolǵan kúni shyǵys qazaqstandyq eki ul men eki qyz analarymen birge týystaryna barǵan.
"Tabiǵi apat ornynda qyrǵyz tarapynyń qutqarý qyzmetteri jumys istep jatyr. Qazaqstandyq diplomattar jergilikti bilikpen turaqty bailanysta. Bizdiń Qyrǵyzstandaǵy Elshiligimiz qaitys bolǵan balalardyń týystaryna barlyq qajet kómek kórsetip jatyr. Bul qaiǵyly oqiǵa QR Syrtqy ister ministrliginiń erekshe baqylaýynda", - dep jazylǵan SIM habarlamasynda.
Osyǵan bailanysty Qazaqstan Syrtqy ister ministri Murat Nurtileý Qyrǵyzstan SIM basshysy Jeenbek Kýlýbaevpen telefon arqyly sóilesip, tótenshe jaǵdaidyń mán-jaiyn jáne eki eldiń tiisti memlekettik organdarynyń ózara is-qimylyn talqylady.
