Qyrǵyzstannyń UQMK tóraǵasy Kamchybek Tashiev týystary arasha túskenine qaramastan, zań buzǵan jaqyndaryn jaýapkershilikke tartqanyn málimdedi, dep habarlaidy Dalanews.kz.
Region TV arnasyna bergen suhbatynda ol Ulttyq qaýipsizdik komitetin basqarýǵa kelgennen keiin týǵan-týys, dos-jaranmen aradaǵy qatynas túbegeili ózgergenin aitty.
Tashievtiń sózinshe, bul qyzmetke kelgen soń kóptegen jaqyn adamdarynan qol úzgen. Qazirgi ýaqytta onyń bir qudaǵiy – iaǵni baýyrlarynyń qaiyn jurty jaǵynan týysy – 2020–2023 jyldary jasaǵan qylmystary úshin UQMK-nyń tergeý izoliatorynda otyr. Ony bosatý úshin týǵan aǵasy, qudasy jáne ózge de týystary birneshe ret arasha túspek bolǵan. Alaida Tashiev mundai yqpalǵa jol bermegenin atap ótti.
«Zań bárine ortaq, qandai talap qoisa, sony oryndaý qajet. Sol sebepti ol áli de qamaýda otyr», – dedi ol.
Sondai-aq tóraǵa aǵasynyń uly jol politsiiasy qyzmetkerlerin balaǵattaǵanyn aityp, bul is te nazardan tys qalmaǵanyn jetkizdi.
«Eger mundai áreketterge kóz jumsaq, erteń bireý prokýrordy, taǵy biri ákimdi qorlaýy múmkin. Onda elde tártip emes, beibereket ornaidy. Sol úshin aǵamnyń balasyn da jaýapqa tartýǵa týra keldi. Osyǵan bailanysty kóptegen jaqyndarym renjidi. Biraq men úshin memlekettegi tártip bárinen joǵary», – dep túiindedi Kamchybek Tashiev.
