Bul jóninde Qyrǵyzstannyń eńbek, áleýmettik qorǵaý jáne migratsiia ministri Qudaibergen Bazarbaev habarlady.
– Biz búgin Ulybritaniia, Ońtústik Koreia elderine azamattarymyzdy jiberemiz. Ári qarai bul tizimdi keńeite beremiz, – dedi eńbek ministri Facebook paraqshasynda.
Qyrǵyz azamattarynyń Japoniiada jumys isteýi jóninde kelisim eldiń eńbek ministrligi men Qyrǵyz memlekettik ýniversiteti janyndaǵy Japontaný institýty arasynda jáne Japoniianyń IBS «Kásibi odaǵy» arasynda júrgizilgen.
Qyrǵyzstan endi azamattaryn Finliandiiaǵa jumys isteýge jiberýge áreket jasap jatyr. Munyń aldynda Germaniiamen kelisimge kelgen.
Búginde Qyrǵyzstanda álemniń 20 eline jumys isteýge jiberetin 118 jeke agenttik bar.
Resmi málimet boiynsha, shetelde 1 mln 118 myń qyrǵyz azamaty jumys isteidi. Onyń milliony Reseide júr.
