Qyrǵyz sailaýy: Alǵashqy qorytyndy boiynsha Jeenbekov alda
Al ekinshi orynda 33,78 paiyz daýys alǵan Ómirbek Babanov, úshinshi orynda 6,48 daýys jinaǵan Adahan Madýmarov keledi.
Negizinen Qyrǵyzstan prezidenttigine úmitker retinde 13 kandidat tirkelgen bolatyn. Alǵashqy úshtikten ózge 10 úmitkerdiń ishinde Temir Sarievtiń jinaǵan 2,56 paiyzynan basqasy 1 paiyz da jinai alǵan joq.
Al naqty aqparatty OSK 20 kúnniń ishinde tolyq jariialaýy tiis. OSK basshysy Nurjan Shaildabekova bul kórsetkishtiń ózgerýi múmkin ekenin aitty. Jáne ol prezident sailaýynyń ekinshi týry bolatyn-bolmaitynyn naqty aita alǵan joq. Degenmen barshamyzǵa belgili, ekinshi týr kandidattardyń eshqaisysy 50 paiyz daýys jinai almai qalǵan jaǵdaida ótedi.
Degenmen sailaýshylardyń basym kópshiligi sailaýdyń ádil ótpegenine de shaǵymdanyp úlgergen. Bul týraly qyrǵyzstandyq BAQ jazyp jatyr. Mysaly NTS.kg saity jergilikti sailaý ýchaskelerinde baqylaýshylarǵa, jýrnalister men qarapaiym halyqqa daýys berý barysyn sýretke nemese videoǵa túsirýge ruqsat etpegeni týraly jazady.
«Mysaly Osh oblysyna qarasty Chon-alai, Úzgen aýdandarynyń sailaý ýchaskelerinde sailaýshylardyń qandai biýlletender alǵanyn, qalai daýys bergenin kameraǵa túsirýge tyiym salynǵan» - deidi sait aqparatynda.
Al sailaý zańnamasyna sáikes, baqylaýshylar men jýrnalisterge daýys berý barysy qalai júrip jatqanyn kameraǵa túsirýge ruqsat berilgen.
Munan bólek taǵy basqa da qyrǵyzstandyq BAQ mundai keleńsizdikterdiń tirkelgenin jazǵan.
