Qyrǵyzstan prezidenti Sadyr Japarov 20 million dollarlyq múlkin zańdastyrdy. Bul týraly ol Facebook-tegi paraqshasynda jazdy, - dep habarlaidy Dalanews.kz.
Qyrǵyzstanda byltyr kiristi zańdastyrý týraly zań qabyldanǵan. Japarovtyń aitýynsha, bul zańdy Qyrǵyzstannyń aýqatty azamattary aqshalaryn sheteldik bankterge jasyrmaýy, el ishinde aýdaryp, otandyq bankterge salýy úshin qabyldaǵan. Zań 1 shildege deiin kúshinde bolyp, sodan keiin kúshin joǵaltady eken.
"Jasyratyny joq, bárimiz (qarapaiym azamattar emes, orta biznesten joǵary kásipkerler) múlkimizdi basqa bireýdiń atyna rásimdedik. Elimizdiń eń bai azamattary áli de óz milliardtaryn sheteldik bankterde saqtaǵysy keledi. Bizde mundai bai adam kóp. Olar nelikten bailyǵyn shetelde jasyrady degen suraqqa jaýap ta qarapaiym. Osy ýaqytqa deiin úlken aqshanyń paida bolý kózi jáne osy qarajatqa tólengen salyq somasy kóptegen suraq týǵyzdy. Osy zań arqyly mundai problema týyndamaýy úshin zańdastyrý múmkindigin jasaimyz", - dedi Qyrǵyzstan basshysy.
Japarov óziniń múlikterine de toqtalǵan. Qyrǵyzstan prezidentiniń aitýynsha, onyń da atynda basqa bireýge jazylǵan múlik bolǵan.
"2005 jyly Joǵary keńeske biznes ortadan halyq qalaýlysy retinde keldim. Bul sýrettegi ǵimarattyń qurylysyn (Ibraimov kóshesi, 96, Bishkek q.) 2005 jyly bastap, 2010 jyly aiaqtadyq. Sáýir tóńkerisinen keiin ony "Ata jurt" partiiasynyń shtaby retinde qoldandyq. Keiinirek oppozitsiiada bolǵanymyz úshin qýdalandyq jáne bul ǵimarat 2020 jylǵa deiin tolyq jumys istemedi. Alaida jer men ǵimaratqa únemi salyq tólep keldik. 2020 jyly Prezident sailaýy kezinde shtab retinde qoldandym. Sodan beri ol tolyq jumys istei bastady.
Árine, buǵan deiin aitqanymdai, ǵimarattarym buryn basqa adamdardyń atyna tirkelgen edi. Qazir olardy zańdastyrý týraly zań negizinde tirkedim. Úlgi kórsetip, birinshi bolyp óz múlkimdi zańdastyrǵym keldi. Qysqasha aitqanda, múlkimniń quny shamamen 20 million dollar bolady. Zańdastyrý úshin memleketke million som tóledim. ...Mende shetelde jinaq joq. Bolsa, olardy bizdiń bankterge salar edim", - deidi Japarov.
Osylaisha, Qyrǵyzstan prezidenti eliniń aýqatty azamattarynan sheteldik bankterde saqtaǵan barlyq aqshasyn eldiń ishindegi bankterge aýdarýdy surapty.
