قىرعىزستان پرەزيدەنتى سادىر جاپاروۆ 20 ميلليون دوللارلىق مۇلكىن زاڭداستىردى. بۇل تۋرالى ول Facebook-تەگى پاراقشاسىندا جازدى، - دەپ حابارلايدى Dalanews.kz.

قىرعىزستاندا بىلتىر كىرىستى زاڭداستىرۋ تۋرالى زاڭ قابىلدانعان. جاپاروۆتىڭ ايتۋىنشا، بۇل زاڭدى قىرعىزستاننىڭ اۋقاتتى ازاماتتارى اقشالارىن شەتەلدىك بانكتەرگە جاسىرماۋى، ەل ىشىندە اۋدارىپ، وتاندىق بانكتەرگە سالۋى ءۇشىن قابىلداعان. زاڭ 1 شىلدەگە دەيىن كۇشىندە بولىپ، سودان كەيىن كۇشىن جوعالتادى ەكەن.

"جاسىراتىنى جوق، ءبارىمىز (قاراپايىم ازاماتتار ەمەس، ورتا بيزنەستەن جوعارى كاسىپكەرلەر) مۇلكىمىزدى باسقا بىرەۋدىڭ اتىنا راسىمدەدىك. ەلىمىزدىڭ ەڭ باي ازاماتتارى ءالى دە ءوز ميللياردتارىن شەتەلدىك بانكتەردە ساقتاعىسى كەلەدى. بىزدە مۇنداي باي ادام كوپ. ولار نەلىكتەن بايلىعىن شەتەلدە جاسىرادى دەگەن سۇراققا جاۋاپ تا قاراپايىم. وسى ۋاقىتقا دەيىن ۇلكەن اقشانىڭ پايدا بولۋ كوزى جانە وسى قاراجاتقا تولەنگەن سالىق سوماسى كوپتەگەن سۇراق تۋعىزدى. وسى زاڭ ارقىلى مۇنداي پروبلەما تۋىنداماۋى ءۇشىن زاڭداستىرۋ مۇمكىندىگىن جاسايمىز"، - دەدى قىرعىزستان باسشىسى.

سادىر جاپاروۆتىڭ الەۋمەتتىك جەلىدەگى پاراقشاسىنان

جاپاروۆ ءوزىنىڭ مۇلىكتەرىنە دە توقتالعان. قىرعىزستان پرەزيدەنتىنىڭ ايتۋىنشا، ونىڭ دا اتىندا باسقا بىرەۋگە جازىلعان مۇلىك بولعان. 

"2005 جىلى جوعارى كەڭەسكە بيزنەس ورتادان حالىق قالاۋلىسى رەتىندە كەلدىم. بۇل سۋرەتتەگى عيماراتتىڭ قۇرىلىسىن (يبرايموۆ كوشەسى، 96، بىشكەك ق.) 2005 جىلى باستاپ، 2010 جىلى اياقتادىق. ءساۋىر توڭكەرىسىنەن كەيىن ونى "اتا جۇرت" پارتياسىنىڭ شتابى رەتىندە قولداندىق. كەيىنىرەك وپپوزيسيادا بولعانىمىز ءۇشىن قۋدالاندىق جانە بۇل عيمارات 2020 جىلعا دەيىن تولىق جۇمىس ىستەمەدى. الايدا جەر مەن عيماراتقا ۇنەمى سالىق تولەپ كەلدىك. 2020 جىلى پرەزيدەنت سايلاۋى كەزىندە شتاب رەتىندە قولداندىم. سودان بەرى ول تولىق جۇمىس ىستەي باستادى.

ارينە، بۇعان دەيىن ايتقانىمداي، عيماراتتارىم بۇرىن باسقا ادامداردىڭ اتىنا تىركەلگەن ەدى. ءقازىر ولاردى زاڭداستىرۋ تۋرالى زاڭ نەگىزىندە تىركەدىم. ۇلگى كورسەتىپ، ءبىرىنشى بولىپ ءوز مۇلكىمدى زاڭداستىرعىم كەلدى. قىسقاشا ايتقاندا، مۇلكىمنىڭ قۇنى شامامەن 20 ميلليون دوللار بولادى. زاڭداستىرۋ ءۇشىن مەملەكەتكە ميلليون سوم تولەدىم. ...مەندە شەتەلدە جيناق جوق. بولسا، ولاردى ءبىزدىڭ بانكتەرگە سالار ەدىم"، - دەيدى جاپاروۆ.

وسىلايشا، قىرعىزستان پرەزيدەنتى ەلىنىڭ اۋقاتتى ازاماتتارىنان شەتەلدىك بانكتەردە ساقتاعان بارلىق اقشاسىن ەلدىڭ ىشىندەگى بانكتەرگە اۋدارۋدى سۇراپتى.