Ál-Farabi atyndaǵy Qazaq ulttyq ýniversitetiniń 90 jyldyǵyna orai, QazUÝ Túlekter qaýymdastyǵy prezidiýmynyń múshesi, «FalconEuroBus» JShS Direktorlar keńesiniń tóraǵasy Murat Ádilhanov oqý ordasyna jańa avtobýs syilady.
Saltanatty rásimge QazUÝ Direktorlar keńesiniń jáne Túlekter qaýymdastyǵynyń tóraǵasy Qairat Mámi, Ál-Farabi atyndaǵy Qazaq ulttyq ýniversitetiniń Basqarma Tóraǵasy – Rektory Janseiit Túimebaev, «FalconEuroBus» JShS Direktorlar keńesiniń tóraǵasy Murat Ádilhanov, bilim ordasynyń oqytýshylary men stýdentteri qatysty.
Sharada JOO basshysy Janseiit Túimebaev sóz sóilep, ýniversitet atynan metsenat Murat Ádilhanulyna alǵys bildirdi.
«Biyl ýniversitetimizdiń qurylǵanyna 90 jyl tolyp otyr. Mereili jyl aiasynda ýniversitette aýqymdy is-sharalar ótýde. QazUÝ ǵalymdary, tanymal túlekteri 90 jyldyqqa óz úlesterin qosýda. Jyl basynda, 15 qańtarda Ál-Farabi kitaphanasynda, mereitoilyq jyldyń ashylý saltanaty ótken bolatyn. Jiynda bizdiń túlegimiz Murat Ádilhanuly QazUÝ-ǵa avtobýs syilaitynyn aityp, arnaiy sertifikat tabystady. Búgin sol jańa avtobýs QazUÝ-ǵa saltanatty túrde berildi. Ýniversitet atynan metsenat túlegimiz Murat Ádilhanulyna alǵys aitamyn», – dedi rektor.
Óz kezeginde Qairat Ábdirazaquly: «Aldaryńyzda turǵan jańa avtobýs ustazdardyń, jastardyń igiligine qyzmet etsin. Túrli konferentsiialarǵa, tabiǵat aiasyndaǵy demalystarǵa osy kólikpen baratyn bolasyzdar. Árdaiym ómirde, ǵylymda joldaryńyz bolsyn», – dep ystyq lebizin jetkizdi.
QazUÝ-ǵa syiǵa tartylǵan jańa avtobýs oqytýshy-professorlar men bilim alýshy jastardyń issaparlaryna paidalanylatyn bolady. Bul jaily kólik ýniversitetten tys sharalarǵa, iaǵni túrli baiqaýlarǵa, sporttyq jarystar men festivalderge stýdentterdiń barýyna óte yńǵaily.
Óz kezeginde Murat Ádilhanov sóz sóilep, jańa avtobýs oqý ordasynyń igiligi úshin paidalanatynyn atap ótti.
«Ál-Farabi atyndaǵy QazUÝ-dyń zań fakýltetin 1994 jyly bitirgen bolatynmyn. Bul joǵary oqý orny meniń jastyǵymnyń kýási. Munda men oqytýshy-professorlardyń tálimin alyp, kóp dostarmen tanystym. Sondyqtan men QazUÝ-ǵa máńgilik qaryzdarmyn. Qara shańyraq oqý ordasyna rizashylyǵymdy jetkizý úshin arnaiy avtobýsty syilap otyrmyz», – dedi metsenat Murat Ádilhanuly.
