Ál-Farabi atyndaǵy Qazaq ulttyq ýniversiteti (QazUÝ) Stýdentter saraiynda qaita jóndeý jumystaryn zańsyz bastaǵan. Bul týraly Almaty qalasynyń mádeniet basqarmasy málimdedi, dep habarlaidy Dalanews.kz.
Basqarma málimetinshe, Stýdentter saraiy 2021 jyldyń 17 naýryzyndaǵy №1/191 qaýlyǵa sáikes Almaty qalasynyń jergilikti mańyzy bar tarih jáne mádeniet eskertkishteriniń memlekettik tizimine engizilgen (№115).
Basqarma ókilderi QazUÝ tarapynan Stýdentter saraiynda ǵylymi-restavratsiialyq jumystar júrgizý týraly ótinish túskenin aitty. Alaida “Tarihi-mádeni mura obektilerin qorǵaý jáne paidalaný týraly” zańnyń 32-babynyń 2-tarmaǵyna sáikes, mundai jumystar tarih jáne mádeniet eskertkishterine arnalǵan ǵylymi-restavratsiialyq jumystardyń ǵylymi-jobalyq qujattamasyna sai júrgizilýi tiis.
“Osyǵan bailanysty basqarma zańnama talaptaryna sáikes ázirlengen ǵylymi-jobalyq qujattamany usyný qajettigi týraly jaýap bergen. Alaida, búgingi kúnge deiin tiisti qujattar usynylǵan joq. Zańnyń 37-babyna sáikes, tarihi-mádeni mura obektilerin qorǵaý jáne paidalaný týraly Qazaqstan Respýblikasynyń zańnamasyn buzý zańda belgilengen jaýapkershilikke ákeledi”, – dep habarlady basqarma ókilderi.
Aita keteiik, buǵan deiin 1989 jyly salynǵan Stýdentter saraiynyń syrtyna qaptalǵan qabyrshaq tastyń túse bastaǵany belgili bolǵan edi.
Eske salaiyq, buǵan deiin depýtat Baqytjan Bazarbek jer máselelerindegi sot sheshimderine qatysty basty problemany ataǵan edi. Bul týraly Dalanews.kz Bes.media-ǵa siltep habarlady.
Respýblikalyq jer komissiiasy Jer Amanaty tóraǵasynyń orynbasary, depýtat Baqytjan Bazarbek Qazaqstandaǵy jer máseleleri boiynsha sot sheshimderiniń oryndalmaýyna bailanysty QR Bas prokýrory Berik Asylovqa saýal joldady.
Baqytjan Bazarbek sottyń ǵimarattardy nemese jer ýchaskelerin buzý nemese qaitarý týraly sheshimderiniń oryndalmai jatqan naqty mysaldaryn keltirdi.
"Ál-Farabi atyndaǵy QazUÝ mańyndaǵy zańsyz ielengen jer ýchaskesi sot sheshimimen memleket menshigine qaitarylýy kerek edi, al ol jerdegi biznes-ortalyq buzylýy tiis bolatyn. Alaida bul jer áli kúnge deiin memleketke berilmegen, al biznes-ortalyq áli de joiylǵan joq", – dedi depýtat.
Almatydaǵy alma baqtaryna qatysty is boiynsha da osyndai jaǵdai oryn alǵan.
"2021 jyldyń 13 qańtaryndaǵy Almaty mamandandyrylǵan ekonomikalyq sotynyń sheshimi jáne 2023 jyldyń 25 jeltoqsanyndaǵy Almaty qalalyq sotynyń jerdiń maqsatty taǵaiyndaýyn ózgertý jáne satý-satyp alý kelisimshartyn joiý týraly qaýlysy oryndalmaǵan. Sot arqyly alma baqtary zańdy túrde memleketke qaitaryldy, biraq is júzinde jeke jáne zańdy tulǵalardyń qolynda qalyp otyr", – dedi Bazarbek.
Depýtat Almatyda zańsyz salynǵan turǵyn úilerdi buzý boiynsha 86 talaptyń tek 59-y ǵana qanaǵattandyrylǵanyn atap ótti. Onyń aitýynsha, ádilet organdary men sot oryndaýshylary sot sheshimderiniń oryndalý merzimderin ádeii sozyp, kedergiler jasaidy.
Baqytjan Bazarbek Shymkenttegi mysaldy da keltirdi. Onda 2023 jyldyń 17 mamyry men 13 shildesindegi Shymkent mamandandyrylǵan ekonomikalyq sotynyń sheshimderi boiynsha Hyundai dilerlik ortalyǵy men turǵyn úi qurylysy úshin jer ýchaskesin berý týraly qala ákiminiń barlyq qaýlylary joiylǵan. Depýtat bul sheshimderdiń oryndalýy ádeii keiinge shegerilýde dep sanaidy.
