Qazaqstannyń jetekshi ýnıversıteti Ál-Farabı atyndaǵy QazUÝ QS WUR reıtıńinde top-200-ge kirip, álemniń úzdik ýnıversıtetteri arasynda kezekti ret kóshbasshylyq pozısıasyn tanytty. Postkeńestik elderden bul topqa tek eki ýnıversıtet – M.V.Lomonosov atyndaǵy MMÝ (78 oryn) men Ál-Farabı atyndaǵy QazUÝ (175 oryn) kiredi.

QazUÝ – álemniń úzdik top-200 ýnıversıteti qataryna alǵash engen jáne halyqaralyq akademıalyq sarapshylardyń da, otandyq jumys berýshilerdiń de joǵary baǵasyn alǵan qazaqstandyq jalǵyz joǵary oqý orny. Mundaı jetistikter bolashaqqa úlken senimmen qaraýǵa jáne joǵary maqsattarǵa umtylýǵa múmkindik beredi.

QazUÝ jahandyq ǵylymı-bilim berý qoǵamdastyǵyna belsendi yqpaldasa otyryp, óz kórsetkishterin álemniń ozyq bilim ordalarynyń halyqaralyq standarttaryna sáıkestendirý baǵytynda úlken jumys júrgizýde. Álemdik akademıalyq qoǵamdastyqtyń moıyndaýy – ýnıversıtettiń jahandyq básekege qabilettiligin rastaıdy jáne oǵan QazUÝ ujymynyń myńdaǵan qyzmetkeriniń árqaısysy óz úlesin qosýda.

Bıylǵy jyly QS WUR ınstıtýsıonaldyq reıtıńine álemniń 97 elinen 1300 joǵary oqý orny qatysty. Aıta ketý kerek, QazUÝ pandemıanyń áserine qaramastan QS by Subject reıtıńinde 11 pándik sala boıynsha pozısıasyn jaqsartty. Sondaı-aq QazUÝ óte joǵary baǵaǵa ıe bolyp, «QS Stars Rating System» halyqaralyq reıtıńisinde «Bes juldyz» basymdyq belgisin ıelengen Ortalyq Azıadaǵy alǵashqy jáne jalǵyz joǵary oqý orny atandy.