Qazaqstan Prezıdenti Qasym-Jomart Toqaev barlyq azamattardy kovıdke qarsy ekpe saldyrýǵa shaqyryp, bul bizdiń azamattyq paryzymyz ekenin atap ótken bolatyn. QazUÝ biraýyzdan memleket basshysynyń úndeýin qyzý qoldap, ekpe saldyrýǵa oń kózqaras tanytty. Eń alǵash bolyp ekpe qabyldaǵan ál-Farabı atyndaǵy QazUÝ Túlekteri qaýymdastyǵynyń atqarýshy dırektory Kúlǵazıra Baltabaeva: «Ekpe saldyrý týraly habarlamany oqydym da esh oılanbastan meni tizimge qosýyn suradym. Óıtkeni, bul derttiń aldyn alý úshin óte qajetti qadam. Sońǵy ret tumaýǵa qarsy ekpe qabyldadym jáne búginge deıin bul aýrýǵa shaldyqpadym. Qazir de ekpege degen senimim mol. Ózim úshin ǵana emes, jaqyndarym úshin de bul óte mańyzdy sheshim» deıdi.
Medısına ǵylymdarynyń doktory, profesor, QR jaratylystaný ǵylymdary akademıasynyń akademıgi, QazUÝ-dyń birinshi prorektory mindetin atqarýshy Qanatbek Muqanov barsha qazaqstandyqtardy ekpe saldyrýdan bas tartpaýǵa shaqyrdy. «Búgingi kúni qoǵamnyń pikiri ekige bólinip, vaksına bizge kerek pe, joq pa degen ekiudaı saýal týyndap tur. Ekpeni sózsiz ektirý kerek! Buǵan basqa balama joq. Men medısına tarıhyndaǵy nebir keseldiń emin tapqan ekpelerdiń tıimdiligi týraly zertteý jumystaryn jasadym. Ekpe – medısına salasyndaǵy ozyq ıdeıalardyń jemisi. Qazir áleýmettik jelilerde chıpter týraly jáne basqa da alypqashpa jalǵan aqparat órip júr. Oǵan senýdiń qajeti joq. Óıtkeni vaksınalyq ekpe adamzatty sheshek, oba jáne basqa da aýyr pandemıalardan qutqaryp qaldy jáne ondaı dert vaksınasıadan keıin qaıtalanbady. Sondyqtan men barlyq azamattardy ekpe jasatýǵa shaqyramyn! Bul máselede eki oı týyndamaǵany abzal. Múmkin bolsa, ekpe saldyrǵan durys. Aldymen, ózińizden buryn, jaqyndaryńyz ben týystaryńyzdyń densaýlyǵyn oılaýyńyz kerek. Búginde osyndaı saýaldar qoǵamda asa ózekti bolyp tur»– dep, barlyq áriptesterine qoldaý bildirdi Qanatbek Muqanov.
QazUÝ prorektory m.a. Mehmet Arslan ekpe saldyrýdyń qoǵam aldyndaǵy úlken jaýapkershilik ekenin aıtady. «Men prorektor retinde qyzmet babymen jıi is-saparlarǵa baramyn. Ártúrli is-sharalar barysynda kóptegen jandarmen kezdesemin. Qyzmet babyna baılanysty ózimdi ózgeler úshin de jaýapty sezinemin. Sondyqtan, birden ekpe qabyldaýǵa sheshim qabyldadym. Stýdentterdiń de, oqytýshylardyń da amandyǵy úshin barlyǵymyz ekpe alýymyz qajet. Ásirese bilim ordasynda barynsha jaýapkershilikti sezinip, memleket tarapynan berilgen múmkindikti durys paıdalanǵan jón» degen oıymen bólisti.
QazUÝ medısınalyq ortalyǵyna ázirge 50 ekpe berilgen. Kelesi lekke 600 ekpe beriletin bolady. Eriktilerdi ekpemen tolyq qamtý josparlanyp otyr.
Aıta keterligi, «Spýtnık V» – álemdegi alǵash tirkelgen, tıimdiligi 90%-dan asatyn úsh ekpeniń biri. Onyń tıimdiligi 91,6%-dy kórsetken, bul málimet 19 866 eriktige synaq júrgizilgennen keıin alynǵan. Qazaqstan – bul ekpeni tirkegen álemdegi 27-shi memleket. Elimizde 1 aqpannan bastap azamattarǵa koronovırýstyq ınfeksıaǵa qarsy ekpe salý bastalǵan bolatyn.
Nıkolaı Gamaleı atyndaǵy epıdemıologıa jáne mıkrobıologıa ǵylymı-zertteý ortalyǵy jasaǵan Gam-KOVID-Vak nemese «Spýtnık V» vaksınasy ımýndyq reaksıasyn kúsheıtý úshin 3 apta aralyǵymen eki ret salynady. Birinshi vaksınamen 26 adenovırýs serotıpine negizdelgen vaksına, al ekinshisimen 5 serotıp engiziledi. Ekpe salý erikti túrde júrgiziledi. Árbir azamat tańdaý quqyǵyna ıe. Erikti túrde sheshim qabyldap, aldyn alý úshin áreket jasaý qazirgi tańda aýrýdan qutylýdyń jalǵyz joly bolyp tabylady.
Ál-Farabı atyndaǵy QazUÝ-dyń Baspasóz qyzmeti
