QazUÝ qalashyǵy qurylysynyń II kezeńi bastaldy
2022 jyly 1 maýsymda Qazaqstan Respýblikasynyń Prezidenti Qasym-Jomart Kemeluly Toqaev Ál-Farabi atyndaǵy Qazaq ulttyq ýniversitetine arnaiy kelip, qyzmetimen tanysty.
Sapary barysynda Prezident QazUÝ qalashyǵy qurylysy II kezeńiniń Bas josparyna úlken qoldaý bildirip, bekitken bolatyn.
QazUÝ qurylysynyń II kezeńin bastaý sharasyna QR Ǵylym jáne joǵary bilim ministri Saiasat Nurbek, Almaty qalasy ákiminiń orynbasary Álisher Ábdiqadyrov, QazUÝ-dyń Basqarma Tóraǵasy – Rektory Janseiit Túimebaev, biznes jáne ǵylym ókilderi, elimizdegi joǵary oqý oryndarynyń rektorlary, iri kompaniia basshylary qatysty.
Jiynda sóz alǵan QR Ǵylym jáne joǵary bilim ministri Saiasat Nurbek búgingi bastamanyń tarihi oqiǵa ekenin aitty.
«QazUÝ-dyń tarihy tereńde. Oqý ordasy alǵash akademiialyq qalashyq modelimen salynǵan bolatyn. 1974-75 jyldardan keiin ýniversitetke keń kólemde investitsiia quiylmaǵan. Sondyqtan búgingi sharanyń mańyzdylyǵy óte joǵary. Jospardy Memleket basshysy Qasym-Jomart Kemeluly qoldap otyr. Qara shańyraq QazUÝ-dyń ekinshi tynysy ashyldy deýge bolady», – dedi ministr.
Shara barysynda Almaty qalasy ákiminiń orynbasary Álisher Ábdiqadyrov sóz sóilep, QazUÝ ujymy men bilim alýshy jastaryn aitýly kúnmen quttyqtady.
Óz kezeginde ýniversitet rektory Janseiit Túimebaev QazUÝ qurylysynyń II kezeńin júzege asyrý stýdentter úshin jasalyp jatqan bastama ekenin jetkizdi.
«QazUÝ elimizdegi irgeli, kóshbasshy oqý orny retinde álemge tanymal. Elimizdiń jáne sheteldiń kóptegen jastary zamanǵa sai bilim alý úshin Qazaq ulttyq ýniversitetin tańdaidy. Búginde oqý ordasynda 24 myńnan astam stýdent bilim alyp jatyr. Onyń ishinde 50-ge jýyq memleketten kelgen 3 myńnan astam sheteldik stýdent bar. QazUÝ QS WUR álemdik reitinginde 150-orynǵa kóterildi. Memleket basshysy bul jospardy ótken jyly ýniversitetimizge jumys saparymen kelgende kórip, barlyq bastamalarymyzǵa qoldaý kórsetti. Búginnen bastap Prezident bekitken jospar boiynsha QazUÝ qalashyǵynyń II kezeńin iske asyrý jumystary bastalady», – dedi rektor.
Keiin Saiasat Nurbek, Álisher Ábdiqadyrov jáne Janseiit Túimebaev keleshek urpaqqa joldaý jazylǵan hatty kapsýlaǵa salyp, qalady.
Bolashaqqa jazylǵan hatta: «Biz QazUÝ-dy jańǵyrtýdyń jańa dáýiri qarsańynda turmyz. Bul – ýniversitet úshin tarihi sát. Mine, búgin qurylysy bastalǵaly turǵan stýdentter qalashyǵyn jańǵyrtýdyń II kezeńinde jasalatyn jumystyń bári sizderdiń igilikterińiz úshin. Osy jataqhanada turyp, oqý korpýstarynda bilimmen qarýlanyp, erteńgi kúni elge qyzmet etedi degen úlken úmitimiz, zor senimimiz bar. Óitkeni el bolashaǵy sizderdiń qoldaryńyzda», – delingen.
Jospar boiynsha qalashyqta 14 700 oryndyq oqý ǵimarattary, 12 myń sharshy metr ákimshilik korpýstar, 35 000 sharshy metr emhana, 3000 sharshy metr sporttyq-saýyqtyrý ortalyǵy, qyzmetkerlerge arnalǵan turǵyn úi, innovatsiialyq ortalyq, ǵylymi-zertteý ortalyǵy, tehnopark jáne stýdentter men magistrlarǵa, doktoranttarǵa úsh gektar jerge 12 myń tósek-orynǵa arnalǵan jataqhanalar boi kóteredi.
Sondai-aq qoldanystaǵy jataqhanalar, oqý korpýstary men ákimshilik ǵimarattar kúrdeli jóndeýden ótetin bolady.
