Kúni keshe ǵana QR Ǵylym jáne joǵary bilim mınıstri Saıasat Nurbektiń qatysýymen kúrdeli jóndeýden ótken №10 jataqhana qaıta ashylyp, stýdentterge paıdalanýǵa berildi.
Kezdesý barysynda mınıstr Saıasat Nurbek jańarǵan jataqhana bólmelerin aralap, stýdent jastarmen pikirlesti.
Ál-Farabı atyndaǵy QazUÝ-dyń Basqarma Tóraǵasy – Rektory Janseıit Túımebaev Memleket basshysynyń jataqhana tapshylyǵyn sheshý tapsyrmalaryna sáıkes atqarylǵan jumystardy atap ótip, jataqhananyń jóndeýge deıingi jáne keıingi jaı-kúıimen tanystyrdy.
Jóndeý kezinde ǵımarattyń syrtqy qasbeti jańartylyp, barlyq bólmeniń qabyrǵalary qaıta árlendi. Esik-tereze aýystyrylyp, ár seksıaǵa zamanaýı dýsh kabınalary qoıyldy. Elektr júıesi qaıta júrgizilip, jaryq berýshi shamdar jańadan ornatyldy. Buǵan qosymsha, ǵımarattyń cý qubyry men káriz júıesi montajdaldy.
313 oryndyq jataqhanaǵa tarıh fakúltetimen qatar, hımıa jáne hımıalyq tehnologıalar fakúlteti men fızıka-tehnıkalyq fakúltetiniń stýdentteri ornalasty.
QazUÝ aldaǵy ýaqytta barlyq jataqhanaǵa kúrdeli jóndeý jumystaryn júrgizip, stýdentterdiń áleýmettik jaǵdaıyn jaqsarta túspek.
