كۇنى كەشە عانا ق ر عىلىم جانە جوعارى ءبىلىم ءمينيسترى ساياسات نۇربەكتىڭ قاتىسۋىمەن كۇردەلى جوندەۋدەن وتكەن №10 جاتاقحانا قايتا اشىلىپ، ستۋدەنتتەرگە پايدالانۋعا بەرىلدى.
كەزدەسۋ بارىسىندا مينيستر ساياسات نۇربەك جاڭارعان جاتاقحانا بولمەلەرىن ارالاپ، ستۋدەنت جاستارمەن پىكىرلەستى.
ءال-فارابي اتىنداعى قازۇۋ-دىڭ باسقارما ءتوراعاسى – رەكتورى جانسەيىت تۇيمەبايەۆ مەملەكەت باسشىسىنىڭ جاتاقحانا تاپشىلىعىن شەشۋ تاپسىرمالارىنا سايكەس اتقارىلعان جۇمىستاردى اتاپ ءوتىپ، جاتاقحانانىڭ جوندەۋگە دەيىنگى جانە كەيىنگى جاي-كۇيىمەن تانىستىردى.
جوندەۋ كەزىندە عيماراتتىڭ سىرتقى قاسبەتى جاڭارتىلىپ، بارلىق بولمەنىڭ قابىرعالارى قايتا ارلەندى. ەسىك-تەرەزە اۋىستىرىلىپ، ءار سەكسياعا زاماناۋي دۋش كابينالارى قويىلدى. ەلەكتر جۇيەسى قايتا جۇرگىزىلىپ، جارىق بەرۋشى شامدار جاڭادان ورناتىلدى. بۇعان قوسىمشا، عيماراتتىڭ cۋ قۇبىرى مەن كارىز جۇيەسى مونتاجدالدى.
313 ورىندىق جاتاقحاناعا تاريح فاكۋلتەتىمەن قاتار، حيميا جانە حيميالىق تەحنولوگيالار فاكۋلتەتى مەن فيزيكا-تەحنيكالىق فاكۋلتەتىنىڭ ستۋدەنتتەرى ورنالاستى.
قازۇۋ الداعى ۋاقىتتا بارلىق جاتاقحاناعا كۇردەلى جوندەۋ جۇمىستارىن جۇرگىزىپ، ستۋدەنتتەردىڭ الەۋمەتتىك جاعدايىن جاقسارتا تۇسپەك.
