Sharanyń basynda Ál-Farabi atyndaǵy QazUÝ-dyń Basqarma Tóraǵasy – Rektory Janseiit Túimebaev jinalǵandardy forýmnyń ashylýymen quttyqtap, mańyzdylyǵyna toqtaldy. Óz sózinde ýniversitet basshysy jas býyndy kásipkerlikke baýlý, el ekonomikasyn damytý úshin ózekti ekenin jetkizdi.
–Tuńǵysh Prezidentimiz – Elbasy Nursultan Nazarbaev qyzmetine kirisken alǵashqy jyldary «aldymen – ekonomika, sodan soń – saiasat» qaǵidasyn ustandy. Bul óz kezeginde elimizdiń naryqtyq ekonomikaǵa kóshýine, kásipkerlikti damytýǵa, el eńsesin kóterýge jol ashty. Qazaqstan ekonomikasynyń táýelsizdik jyldary baǵyndyrǵan beles, alǵan asýynda kásipkerliktiń úlesi zor. Qazirgi tańda bizdiń elimizde jas biznesmenderge jan-jaqty qoldaý kórsetilip keledi. Máselen, QazUÝ-da Ekonomika jáne biznes joǵary mektebi jumys isteidi. Jyl saiyn osy jerden 500 bakalavr, magistr jáne PhD doktorlary oqýlaryn tamamdap shyǵady. Búgingi ótip jatqan forýmnyń jas mamandar úshin bereri mol dep esepteimin, – dep atap ótti Janseiit Túimebaev.
Forým aiasynda sóz sóilegen kásipkerlerdiń kópshiligi Qazaq ulttyq ýniversitetiniń túlekteri. Solardyń biri – «Muzzone» mýzykalyq telearnasynyń jáne «TAN Media Group» JShS basshysy, Ál-Farabi atyndaǵy QazUÝ Direktorlar keńesiniń múshesi Armanjan Baitasov. Ol ýniversitet qabyrǵasynda oqyp júrip-aq kásipkerlikpen ainalysqanyn aitady.
–QazUÝ – bizdiń alma materimiz. Búgingi jiynǵa qatysýshylardyń kóbi stýdent kezinde bilim men biznesti qatar alyp júrgender. 90-jyldary óte qiyn boldy. Soǵan qaramastan, bizneske degen qyzyǵýshylyǵymyzdyń arqasynda osyndai jetistikke jettik. Al qazirgi jastardyń kásippen ainalysýyna barlyq múmkindikter qarastyrylǵan. Tek kitap oqyp, oi óristerin jetildirýi qajet, – deidi ýniversitet túlegi.
Sondai-aq forýmda sóz sóilegen qazaqstandyq biznesmen jáne qoǵam qairatkeri, RG Brands jáne Resmi Group negizin qalaýshy Qairat Májibaev sapaly bilim berýdiń mańyzdylyǵyna toqtaldy. Ol óz kezeginde bilimdi kásipker mol tabysqa jetetinin aitty. Sol sebepten ol jastardy biznes bastaýda qoryqpaýǵa shaqyrdy.
Spikerler paidaly aqparatpen bólisip qana qoimai, qatysýshylardyń suraqtaryna jaýap berdi.
Is-shara barysynda Ál-Farabi atyndaǵy QazUÝ men «TAN Media Group» JShS yntymaqtastyq týraly memorandýmǵa qol qoidy.
Sonymen qatar forým aiasynda eki apta buryn uiymdastyrylǵan «Media café» baiqaýynyń qorytyndysy jariialandy. Saiysta úsh adamnan quralǵan top, iaǵni Nursultan Ońdasynov, Ásem Erlanova, Dinaman Serikqan ózderiniń kreativti jobalaryn usynyp, bir jyl kofehanany basqarý grantyn jeńip aldy. Forým uiymdastyrýshylary ýniversitet aýmaǵynda kofehananyń qurylýyn tolyq qarjylandyrady. Oǵan barlyq qajetti jabdyqtarmen qamtamasyz etý, oqytý kiredi.
Osylaisha ýniversitet qabyrǵasynda alǵash ret ótken forýmǵa qatysa otyryp, stýdentter paidaly aqparat aldy.
