QazUÝ-da Murat Áýezovke arnalǵan halyqaralyq konferentsiia ótti
Taǵylymdy jiynnyń maqsaty – Murat Muhtarulynyń ǵylymi, shyǵarmashylyq eńbekterimen qatar, qoǵamdyq jáne memlekettik qyzmetiniń mańyzdy kezeńderin saralap, qairatker qalamgerdiń rýhani murasyn nasihattaý.
Is-sharaǵa memleket jáne qoǵam qairatkerleri, Almaty qalasynyń ákimdigi, TÚRKSOI halyqaralyq uiymynyń bas hatshysy Sultan Raev, Tatarstan jazýshylar odaǵynyń tóraǵasy Zaidýlla Rkail, Tatarstan halyqtary assambleiasynyń tóraǵasy Irek Sharipov, QR Ulttyq kitaphanasynyń direktory Baqytjamal Ospanova qatysyp, mereitoi iesin quttyqtady.
Sonymen qatar Qyrǵyzstan, Ózbekstan, Tatarstan, Gollandiia elderinen kelgen ǵalymdar, aqyn-jazýshylar, elimizdiń ziialy qaýym ókilderi, Murat Áýezdiń zamandas dostary, QazUÝ-dyń oqytýshy-professorlar quramy men stýdentteri qatysty.
Konferentsiia jumysyn ashqan Ál-Farabi atyndaǵy QazUÝ-dyń Basqarma Tóraǵasy – Rektory Janseiit Túimebaev mereitoi iesiniń qazaq rýhaniiatynda alatyn erekshe ornyn atap ótti.
– Murat Muhtaruly esimi qazaq halqyna ǵana emes, barsha túrki dúniesi men islam álemine jaqsy tanys. Qalamger Máskeýde oqyp júrgen kezinde qazaq jastarynyń basyn qosqan «Jas tulpar» qozǵalysynyń beldi múshesi, jetekshileriniń biri boldy. Semei iadrolyq poligonyn jabý jóninde bastama kótergen «Nevada – Semei» qozǵalysyna múshe bolyp, eldik máselelerge atsalysty. Táýelsizdiktiń alǵashqy jyldarynda Qazaqstannyń Qytai Halyq Respýblikasyndaǵy tuńǵysh tótenshe jáne ókiletti elshisi qyzmetin abyroimen atqaryp, ulttyq diplomatiianyń damýyna úles qosyp, eki el arasyndaǵy bailanystardy jańa baǵytta iske asyrýǵa kúsh saldy. «Qazaqfilm» kinostýdiiasynda bas redaktor bolǵan kezeńde ulttyq kinematografiiadaǵy jańa tolqyndy qalyptastyrdy. Qazaqstan jazýshylar odaǵynda eńbek etken jyldary kórkem aýdarma jáne ádebi bailanystar salasyn damytty, – dedi rektor.
Jiynda sóz alǵan TÚRKSOI halyqaralyq uiymynyń bas hatshysy Sultan Raev:
– Murat Áýezov – asyldyń synyǵy, ulttyń ar-ojdany, ziialylyqtyń ainasy, filosof ǵalym. Qazaq halqynda «Tektiden tekti týady, tektilik tuqym qýady» degen danalyq sóz bar. Murat Muhtaruly osy asyl sózdi boiyna sińirip, áke jolyn abyroimen jalǵastyryp keledi. Ol qazaq halqynyń ǵylymyn, kórkem ádebietin, kino óneri men televiziiasyn damytýǵa eleýli úles qosqan qairatker tulǵa, – dedi.
Shara barysynda shyǵystanýshy, túrkitanýshy, tarihshy ǵalymdar Robert Ermers, Safar Abdýllo, Aleksandr Qadyrbaev, Rkail Zaidýllin baiandama jasap, professor Murat Muhtarulynyń ádebi jáne saiasattaǵy zor úlesi men jetistikterine toqtaldy.
Konferentsiiada Murat Muhtarulynyń túrik tilindegi «Birliktelik» (Birlik) kitabynyń tusaýy kesildi. Bul jinaq TÚRKSOI halyqaralyq uiymynyń qoldaýymen jaryq kórdi.
Jiyn sońynda mereitoi iesi jiylǵandarǵa alǵysyn bildirip, rizashylyǵyn jetkizdi. Halyqaralyq ǵylymi-tájiribelik konferentsiia jumysy ári qarai sektsiialarda jalǵasty.
Ál-Farabi atyndaǵy QazUÝ-dyń Baspasóz qyzmeti
