Aýqymdy is-sharanyń basty maqsaty – ınovasıa men shyǵarmashylyqty ushtastyrý arqyly jastar patrıotızmin damytý.
Forýmǵa Ál-Farabı atyndaǵy QazUÝ-dyń Basqarma Tóraǵasy – Rektory Janseıit Túımebaev, Ulttyq kınony qoldaý memlekettik ortalyǵynyń basqarma tóraǵasy Esetjan Qosýbaev, Almaty oblysy Aqsý aýdany Qapal aýyldyq okrýgi ákimi apparatynyń bas mamany Vladımır Chepel, QR Mádenıet salasynyń úzdigi, aqyn Baqyt Jaǵyparuly jáne forým jeńimpazdary men stýdentter qatysty.
Sharanyń basynda sóz sóılegen ýnıversıtet rektory Janseıit Túımebaev forým qatysýshylaryn jeńisimen quttyqtap, ystyq lebizin bildirdi.
– Qazaqstan – daryndy jastar mekeni. Bizdiń elimizde jastardyń alańsyz oqyp, bilim alýyna, shyǵarmashylyqpen aınalysyp, qalaǵan mamandyq ıesi atanýyna barlyq jaǵdaı jasalǵan. Qazaqstannyń bolashaǵy sizderge – sizderdiń bilimderińizge, energıalaryńyz ben patrıotızmderińizge baılanysty. Táýelsiz elimizdiń maqtanyshyna aınalyp, ómirdiń barlyq salalarynda úlken jetistikterge jetýlerińizge shyn júrekten tilektespin!» – dedi ýnıversıtet rektory.
Keıin Janseıit Túımebaev ýnıversıtet stýdentterin ánurandy jandy daýysta hormen oryndaýǵa shaqyryp, jastarmen birge shyrqady.
Respýblıkalyq forýmǵa aǵymdaǵy jyly 2000-ǵa jýyq jumys qabyldanǵan. Solardyń ishinen iriktelgen 107 qatysýshy marapat keshine joldama alyp otyr. Bıyl forýmǵa qatysýshylar esse jazý, ınovasıalyq joba, kórkem sóz oqý, beınerolık daıyndaý, azamattyq-patrıottyq baǵyttaǵy poezıalyq shyǵarma jazý, sybaılas jemqorlyqqa qarsy joba men sýret óneri sıaqty segiz baǵyt boıynsha baq synasty. Gala-konsert barysynda ár nomınasıa boıynsha jeńiske jetken gran-prı ıegerlerine bir jyldyq grant sertıfıkaty tabystaldy. Sonymen qatar sharada birinshi, ekinshi jáne úshinshi oryn ıegerleri de marapattaldy.
«Men jastarǵa senemin!» respýblıkalyq forýmynyń gran-prı ıegerleriniń biri – Semeı memlekettik medısına ýnıversıtetiniń stýdenti Damır Shadıbekuly. Ol «Dáriger – ardaqty mamandyq» beınerolık baıqaýyna óziniń týyndysyn usynyp, jeńiske jetip otyr.
«Jastardyń eńbegin baǵalap, múmkindik beretin búgingi forýmnyń mańyzdylyǵy óte joǵary. Osy forýmdy ótkizýge muryndyq bolǵan barsha uıymdastyrýshylarǵa alǵysym sheksiz. Jeńiske jetkenime óte qýanyshtymyn», – dedi Damır Shadıbekuly.
Shara sońy arnaıy daıyndalǵan konserttik baǵdarlamamen aıaqtaldy.
