Kezdesý barysynda rektor ýnıversıtettiń keıbir strategıalyq baǵyttary týraly aıtty. Atap aıtqanda, sıfrlyq ýnıversıtet qurý, zertteý ýnıversıteti deńgeıine jetý, oqý ordasyndaǵy menejmentti ózgertý, ulttyq ýnıversıtet ataǵyna sáıkes oqý ádistemelik jáne ǵylymı ádistemelik ortalyq retindegi jumystardy retke keltirý, ınfroqurylymdardy jolǵa qoıý, sondaı-aq, ǵylymı zertteý, bilim, tárbıe berý syndy oqý ordasynyń ishki jumystary týraly sóz qozǵady.
– Oqý jyly basynan beri biz eń aldymen bakalavrıattaǵy oqý isine úlken mán berdik. Ol úshin eń aldymen oqý kýrsyn júrgizý, bilim berýdi josparlaý jáne baqalaý júıesi retke keltirildi. Bizde oqý prosesin josparlaý men uıymdastyrý jaǵynan suraqtar bolmaý kerek. Sondaı-aq, jemqorlyqty joıý, jas ǵalymdardy yntalandyrý, ǵylymdy qarjylandyrýdy jobalyq júıege kóshirý, ózge ýnıversıtttermen tájirıbe almasý, jas oqytýshylar men ǵalymdardy tartý, jastarǵa durys tárbıe berý jáne olarǵa qolaıly áleýmettik orta qalyptastyrý jaǵynan da jumystar atqarylýda. Árıne, qolǵa alyp otyrǵan jumystar kóp. Olardyń barlyǵyn bir mezgilde sheship tastaý múmkin de emes. Degenmen, ret-retimen biz barlyq máseleni de sheshemiz, – dedi ýnıversıtet rektory T.Ospanuly.
Búgingi kúni ýnıversıtterge akademıalyq erkindik berý máselesi sóz bolyp jatqany belgili. Rektor eger osyndaı múmkindik týsa, zertteý ýnıversıteti deńgeıine jetýge bolatynyn senimmen aıtty.
Rektormen bolǵan ár kezdesý eki saǵatqa deıin sozyldy. T.Ospanuly eń aldymen kezdesýlerdiń barynsha ashyq bolǵanyn talap etti. Sondyqtan jıynǵa kelgenderdiń barlyǵy óz oılaryn, tolǵandyryp júrgen suraqtaryn ashyq qoıyp, jaýap alýǵa múmkindik aldy. Sondaı-aq, suraqtarmen qatar usynys, ótinish, tilekter de, ýnıversıtet rektoryna aıtylǵan alǵystar da kóp boldy.
Nurmuhammed Mamyrbekov
https://dalanews.kz/33351
