«Oi-pikirler túni» – álemniń túkpir-túkpirin keń taraǵan mańyzdy shara. Bul basqosýda qazirgi zamannyń kórnekti tulǵalary oi-pikirlerin almasatyn dialog alańy desek bolady. Ásirese bul shara Frantsiia men frantsýz tilinde sóileitin memleketterde keńinen tanymal.
Is-shara qazirgi zamanǵy mańyzdy máselelerdi talqylaý maqsatynda ziiatkerlerdiń, ǵalymdardyń, sýretshiler jáne ártisterdiń, sondai-aq qoǵam qairatkerleriniń basyn qosyp keledi. Álemdegi júzden astam bilim berý, ǵylymi jáne mádeni ortalyqtar oi-pikirlerdi bir ýaqytta talqylaýǵa arnalǵan óz alańdaryn usyndy.
Almatyda ótken «Oi-pikirler túnin» Ýniversitet rektory Takir Balyqbaev ashty. Birinshi talqylaý alańynda Almaty qalasyndaǵy Frantsiianyń Bas konsýly Aleksis Shahtahtinskii, QR Ulttyq ǵylym akademiiasynyń prezidenti Murat Jurynov, Almaty qalalyq sotynyń Azamattyq jáne ákimshilik ister jónindegi basqarmasynyń tóraǵasy Bahyt Qaseinov, Frantsýz saýda-ónerkásiptik palatasynyń vitse-prezidenti Kristof Pelisson, S.D. Asfendiiarov atyndaǵy QazUMÝ rektory Talǵat Nurǵojin, Qazaqstan-Resei meditsinalyq ýniversitetiniń rektory Nurlan Jainaqbaev, «Ortalyq klinikalyq aýrýhana» AQ klinikasynyń vitse-prezidenti Sholpan Aiýpova jastarǵa quttyqtaý joldady.
Frantsýz tilinde óz jobalaryn qorǵaǵan stýdentter men magistranttar «Búgingi zamanǵa sai serpilis» taqyrybynda talqylaýǵa qatysý úshin tańdaldy.
Qazaqstandaǵy «Rýsskii Registr» sertifikattaý qaýymdastyǵynyń direktory Birjan Jantýarov Sorbonna-Qazaqstan institýtynyń basshylyǵyna «Sapa rastalǵan» sertifikatyn tabys etti.
Kezdesýde Sorbonna-Qazaqstan Institýtynyń qazaqstandyq seriktesi – Qazaqstan Respýblikasy Tuńǵysh Prezidentiniń qory usynǵan «Belgisiz Qazaqstan» jas sýretshilerdiń fotokórmesi ótti, memlekettik úrmeli aǵash aspaptar kvinteti óz ónerlerin ortaǵa saldy.
QazUPÝ-dyń Óner, mádeniet jáne sport institýtynyń kórkem sýret kafedrasynyń dotsenti, «Daryn» Memlekettik syilyǵynyń laýreaty, QR Sýretshiler odaǵynyń múshesi Nurlan Qilybaevtyń «Myń boiaýly uly dala» kórmesi aýditoriiada úlken qyzyǵýshylyq týdyrdy.
Aita ketý kerek, bul institýttyń oqytýshylary men stýdentteri «Oi-pikirler túnin» uiymdastyrý men ótkizýge erekshe úles qosty. Stýdentter qoldanbaly óner buiymdarynyń ekspozitsiiasyn daiyndasa, institýttyń qazaq halyq aspaptar orkestri kontserttik baǵdarlama uiymdastyrdy. Sonymen qatar shara barysynda filosofiia doktory, dizain kafedrasynyń dotsenti Raýshan Qanapianova «Shańyraq» jáne «Jer Ana» sán kórsetilimderin jurtshylyq nazaryna usynyldy. Sonymen qatar frantsýz tilinde filmder kórsetildi.
«Oi-pikirler túni» halyqaralyq is-shara Abai atyndaǵy Qazaq ulttyq pedagogikalyq ýniversitettiń Óner, mádeniet jáne sport institýty jáne Sorbonna-Qazaqstan institýty, Qazaqstandaǵy Frantsiia elshiligi jáne Frantsýz Ortalyq Aziiany zertteý institýtynyń belsendi qoldaýymen ótkizildi.
Rimma JANBAEVA
