Almaty qalasynyń Almaly aýdandyq soty «QazTAG» aqparat agenttiginiń bas direktory Aset Mataevqa, bas redaktory Ámir Qasenovqa jáne Janna Qaparovaǵa qatysty úkim shyǵardy. Is Freedom Finance brokerlik kompaniiasy týraly jariialanǵan materialdarǵa bailanysty qaraldy, dep habarlaidy dalanews.kz.
Sot Aset Mataevty qyzmettik mindetterine adal qaramady jáne buzaqylyq jasady dep tanyp, 3 jyl 6 aiǵa bas bostandyǵyn shekteý jazasyn taǵaiyndady. Sondai-aq oǵan 3 jyl boiy jýrnalistik qyzmetpen ainalysýǵa tyiym salyndy.
Ámir Qasenov kórineý jalǵan aqparat taratqany úshin kináli dep tanyldy. Amnistiia týraly zań qoldanylǵannan keiin oǵan 1 jyl 3 ai bas bostandyǵyn shekteý jazasy berildi. Sonymen qatar, 5 jyl boiy jýrnalistika salasynda jumys isteý quqyǵynan aiyryldy.
Janna Qaparova da kináli dep tanyldy. Alaida amnistiiaǵa bailanysty oǵan taǵaiyndalǵan jaza merzimi nólge deiin qysqartyldy. Úkimdi sýdia Ernar Qasymbekov jariialady.
Sot úkimine sáikes, sottalǵandardan Freedom Finance kompaniiasynyń paidasyna 165,4 mln teńge kóleminde materialdyq shyǵyn ortaq tártippen óndiriletin boldy. Budan bólek, ókildik etý shyǵyndary men memlekettik bajdy tóleý mindetteldi.
Sondai-aq sot Aset Mataev pen Ámir Qasenovke buǵan deiin jariialanǵan materialdardy alyp tastaý týraly sot sheshimin oryndamaǵan jaǵdaida zańda kózdelgen jaýapkershilik bar ekenin túsindirdi.
